រដ្ឋបាលរាជធានីភ្នំពេញ បានជូនដំណឹងដល់ពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជន ដែលប្រើប្រាស់សេវាប្រមូលសំរាម និងសំណល់រឹង ត្រូវតែអនុវត្ត និងបង់សេវាឲ្យបានទាន់ពេល បើពុំដូច្នោះ នឹងត្រូវផាកពិន័យ។
សាលារាជធានីភ្នំពេញ បានប្រាប់ឱ្យពលរដ្ឋ ម្ចាស់អាជីវកម្ម សេវាកម្ម និងស្ថាប័នឯកជន ដែលមិនទាន់បង់ថ្លៃសេវាប្រមូលសំរាម និងសំណល់រឹង រួសរាន់បង់ឱ្យបានទាន់ពេលវេលា ដើម្បីបញ្ចៀសការផាកពិន័យ។ នេះបើតាមសេចក្តីជូនដំណឹងរបស់សាលារាជធានីភ្នំពេញ។
បើតាមសេចក្តីជូនដំណឹង របស់រដ្ឋបាលរាជធានីភ្នំពេញ បានកត់សម្គាល់ឃើញថា ចាប់តាំងពីអាជ្ញាធរសម្រេចឱ្យពលរដ្ឋបង់ថ្លៃសេវាសំរាម តាមរយៈប្រព័ន្ធអេឡិចត្រូនិចរហូតមកដល់ពេលនេះ គឺមានប្រជាពលរដ្ឋភាគច្រើនបានបង់ថ្លៃសេវាប្រមូលសំរាមរួចហើយ ប៉ុន្ដែពលរដ្ឋមួយចំនួន មិនទាន់បានបំពេញកាតព្វកិច្ចបង់ថ្លៃសេវាប្រមូលសំរាម និងសំណល់រឹងនេះនៅឡើយ។
សាលារាជធានីភ្នំពេញ បានបញ្ជាក់ថា បើសិនជាពលរដ្ឋនៅតែមិនបង់ថ្លៃសេវាប្រមូលសំរាមទេ នោះអាជ្ញាធរនឹងបញ្ចេញបញ្ជីឈ្មោះអ្នកដែលមិនទាន់បង់ថ្លៃសេវាប្រមូលសំរាម និងសំណល់រឹងជាសាធារណៈ តាមបណ្ដាញសង្គម និងប្រព័ន្ធផ្សព្វផ្សាយនានា។ ក្រៅពីនេះអាជ្ញាធរ ក៏នឹងកត់ត្រាជាបំណុល ហើយអនុវត្តតាមវិធានការរដ្ឋបាល ដោយបិទអាជីវកម្ម ឬសេវាកម្មបណ្ដោះអាសន្ន និងអនុវត្តវិធានការផ្សេងៗទៀត តាមការចាំបាច់។
រដ្ឋបាលរាជធានីភ្នំពេញ បានដាក់អនុវត្តនូវការទូទាត់បង់ថ្លៃសេវាប្រមូលសំរាមប្រចាំខែ តាមរយៈប្រព័ន្ធអេឡិចត្រូនិក បញ្ជរទូទាត់នៅតាមធនាគារ ទីភ្នាក់ងារវេរលុយផ្សេងៗដែលមាននៅក្នុងកម្មវិធីទូរសព្ទ និងនៅទីសាធារណៈ ចាប់តាំងពីខែកុម្ភៈ ឆ្នាំ២០២០មក។ ពលរដ្ឋ ត្រូវបង់សេវាប្រមូលសំរាមនេះ ក្នុងរយៈពេល១៥ថ្ងៃ ចាប់ពីថ្ងៃទី១-១៥ ជារៀងរាល់ខែ។
ពលរដ្ឋ អាចបង់ថ្លៃសំរាមតាមប្រព័ន្ធអេឡិចត្រូនិក តាមធនាគារអេស៊ីលីដា និងតាមភ្នាក់ងារវេរលុយដែលមានដូចជា Wing, AMK, True money, Dara Pay, PiPay, EMoney និងលីហួរវេរលុយជាដើម។ បើតាមសាលារាជធានីភ្នំពេញ រដ្ឋាភិបាលបានអនុញ្ញាតឲ្យក្រុមហ៊ុនស៊ិនទ្រី ប្រមូលសំរាមនៅតាមគេហដ្ឋាន ឬតាមស្ថាប័ននានា ប៉ុន្តែមិនមានសិទ្ធិប្រមូលថ្លៃសេវាសំរាមឡើយ៕
