ក្រុមមេៗវិនិយោគិនបរទេសទាំងអស់ កំពុងបង្កើនការប្រុងប្រយ័ត្នជាមួយការវិនិយោគនៅប្រទេសវៀតណាម បន្ទាប់ពីមិនមានការផ្លាស់ប្ដូរខ្លាំងលើវិស័យមួយនេះ សម្រាប់ត្រីមាសដំបូងនៃឆ្នាំ ២០២៣។ នេះបើតាមការស្ទង់មតិដែលបានចេញផ្សាយកាលពីថ្ងៃអង្គារដោយសភាពាណិជ្ជកម្មអឺរ៉ុបនៅប្រទេសវៀតណាម។
សន្ទស្សន៍អាជីវកម្មប្រចាំត្រីមាសបានបញ្ជាក់ថា វៀតណាមនៅតែជាគោលដៅធំបំផុតសម្រាប់វិនិយោគិនបរទេស ប៉ុន្តែដោយសារតម្រូវការសកលមានការថយចុះ និងភាពមិនប្រាកដប្រជាលើស្ថានការណ៍នយោបាយ និងបទប្បញ្ញត្តិក្នុងស្រុក បាននាំឱ្យអ្នកគ្រប់គ្រងភាគច្រើននៅតែមានការប្រុងប្រយ័ត្ន។
ការស្ទង់មតិដែលផ្តោតលើក្រុមហ៊ុនអឺរ៉ុប និងបុគ្គលដែលប្រតិបត្តិការនៅក្នុងប្រទេសវៀតណាម បានបង្ហាញថា ៥៨%នៃអ្នកគ្រប់គ្រងដែលបានស្ទង់មតិជាង ២០០ មិនមានគម្រោងផ្លាស់ប្តូរផែនការវិនិយោគរបស់ពួកគេ នៅក្នុងប្រទេសវៀតណាមក្នុងត្រីមាសនេះទេ។
សូមជម្រាបដែរថា វៀតណាមទទួលបានការវិនិយោគពីបរទេសដោយផ្ទាល់ (FDI) ប្រមាណ ៤,៣ពាន់លានដុល្លារនៅត្រីមាសនេះ តិចជាងឆ្នាំទៅប្រហែល ២,២%។
វិនិយោគិនបរទេសដែលកំពុងវិនិយោគនៅវៀតណាមភាគច្រើនមកពីប្រទេសហូឡង់ បារាំង លុចសំបួរ និងអាល្លឺម៉ង់ ដែលសុទ្ធសឹងតែជាសមាជិកអឺរ៉ុប ជាមួយនឹងទំហំថវិកាវិនិយោគសរុបច្រើនជាង ២០ពាន់លានដុល្លារ។
បន្ថែមពីនោះ ក្រុមហ៊ុនបរទេសទាំងនោះក៏បានបញ្ជាក់ទៀតថា ពួកគេគ្មានគម្រោងក្នុងការបន្ថែមបុគ្គលិកនាត្រីមាសនេះឡើយ ដែលបណ្ដាលឲ្យមានការសន្និដ្ឋានថា អាចនឹងមានការកាត់បន្ថយបុគ្គលិកប្រមាណ ១៦% បន្ថែមទៀត៕
