កូរ៉េខាងត្បូង គឺជាប្រទេសមានសេដ្ឋកិច្ចឈានមុខគេមួយក្នុងចំណោមបណ្ដាប្រទេសនានានៅតំបន់អាស៊ី ខណៈវិស័យបច្ចេកវិទ្យា និងប្រព័ន្ធអប់រំនៅទីនោះក៏មានការអភិវឌ្ឍន៍គួរឲ្យកត់សម្គាល់ផងដែរ។
យោងតាមការចុះផ្សាយពី VNEXPRESS បានបង្ហាញថា បច្ចុប្បន្នជនជាតិវៀតណាមគឺជានិស្សិតបរទេសដែលកំពុងសិក្សានៅកូរ៉េខាងត្បូងច្រើនបំផុត ប្រមាណជាង ៧ម៉ឺននាក់ ខណៈចិនឈរនៅលេខ ២ មាននិស្សិតសិក្សានៅទីនោះប្រមាណ ៦៣ ៨៥៩នាក់។
ប្រភពដដែលបន្ថែមថា កូរ៉េខាងត្បូងគឺជាគោលដៅទីមួយ សម្រាប់និស្សិតវៀតណាមដែលមានបំណងចង់ទៅបន្តការសិក្សានៅបរទេស ខណៈអូស្ត្រាលី និងអាមេរិកស្ថិតនៅលេខរៀងបន្តបន្ទាប់ ដែលមាននិស្សិតវៀតណាមសិក្សានៅទីនោះប្រមាណ ២ម៉ឺននាក់។
សូមជម្រាបដែរថា ថ្មីៗនេះ សេវាអន្តោប្រវេសន៍កូរ៉េ បានចេញរបាយការណ៍មួយថា មាននិស្សិតបរទេសប្រមាណជាង ២០០ ០០០ នាក់កំពុងសិក្សានៅប្រទេសកូរ៉េខាងត្បូងគិតត្រឹមចុងខែកុម្ភៈ ដែលមានការកើនឡើងជាង ១០០ ០០០នាក់ បើធៀបនឹងខែមករា៕
