ប្រទេសចិនបានកំពុងបន្តពង្រីកឥទ្ធិពលរបស់ខ្លួន ទៅកាន់តំបន់អាស៊ីអាគ្នេយ៍ ខណៈសហរដ្ឋអាមេរិកហាក់បាត់បង់ឥទ្ធិពលរបស់ពួកគេ មកលើប្រទេសនៅតំបន់អាស៊ាន។
យោងតាមរបាយការណ៍ផ្ដល់ឲ្យដោយ Lowy Institute បានឲ្យដឹងថា អាមេរិកកំពុងបាត់បង់ឥទ្ធិពលរបស់ខ្លួនទៅកាន់ប្រទេសចិន ដោយឆ្លងកាត់វិធានការអំណាចចំនួនបួន – ទំនាក់ទំនងសេដ្ឋកិច្ច បណ្តាញការពារ ឥទ្ធិពលការទូត និងឥទ្ធិពលវប្បធម៌ចាប់តាំងពីឆ្នាំ២០១៨។
រង្វាស់ឥទ្ធិពលរវាងចិន និងអាមេរិកមានចំពោះតំបន់អាស៊ីអាគ្នេយ៍កាលពីឆ្នាំ២០១៨ គឺ ៥២-៤៨ ប៉ុន្តែនៅឆ្នាំ២០២២ តួលេខបានកើនឡើងដល់ ៥៤-៤៦ ខណៈរង្វាស់ឥទ្ធិពលនេះគឺមានសារៈសំខាន់ជាទីបំផុត សម្រាប់ប្រទេសនៅតំបន់អាស៊ីយកមកពិចារណាមុននឹងសម្រេចចិត្ត ត្រូវដើរតាមយុទ្ធសាស្ត្ររបៀបណា ទើបអាចទទួលបានផ្លែផ្កាល្អ។
គួររំលឹកដែរថា ឥទ្ធិពលរបស់ចិនក្នុងនាមជាមហាអំណាចមួយនៅអាស៊ីអាគ្នេយ៍ គឺស្ថិតនៅក្នុងទំនាក់ទំនងការទូត និងសេដ្ឋកិច្ច ចំណែកសហរដ្ឋអាមេរិកមានភាពល្អប្រសើរក្នុងបណ្តាញការពារ និងឥទ្ធិពលវប្បធម៌។
សូមជម្រាបបន្ថែមថា ប្រទេសនៅអាស៊ីអាគ្នេយ៍ដែលទទួលរងឥទ្ធិពលពីចិនខ្លាំងបំផុតគឺ កម្ពុជា ឡាវ មីយ៉ាន់ម៉ា ប្រ៊ុយណេ ម៉ាឡេស៊ី និងឥណ្ឌូណេស៊ី ស្របពេលហ្វីលីពីន និងសិង្ហបុរីមានទំនោរទៅរកអាមេរិកជាង៕
