ទ្រព្យសម្បត្តិមហាសេដ្ឋី Elon Musk មានការធ្លាក់ចុះរហូតដល់ ១២ពាន់លានដុល្លារ ត្រឹមរយៈពេលតែមួយថ្ងៃប៉ុណ្ណោះ ពោលនាថ្ងៃទី ២២ មេសា ២០២៣ បន្ទាប់ពីទទួលបានដំណឹងអាក្រក់ពីក្រុមហ៊ុនទាំង៣ គឺ SpaceX, Twitter និង Tesla។
យោងតាមការចុះផ្សាយពី Bloomberg’s Billionaires Index បានបង្ហាញថា នេះគឺជាការរបូតលុយច្រើនបំផុតរបស់មហាសេដ្ឋីអាមេរិករូបនេះ គិតតាំងពីបើកទំព័រឆ្នាំថ្មី មកទល់បច្ចុប្បន្ន។
ហេតុផលដែលធ្វើឲ្យ Elon Musk ខាតបង់ថវិកាដោយសារ តម្លៃហ៊ុន Tesla ធ្លាក់ចុះដល់ទៅ ៩,៨% បន្ទាប់ពីប្រាក់ចំណូលប្រចាំត្រីមាសទីមួយ ធ្លាក់ចុះ ២៤% ស្របពេលមេធំម្នាក់នេះនៅតែបន្តទម្លាក់តម្លៃរថយន្ត ដើម្បីបង្កើនចំនួនលក់នៅទីផ្សារអាមេរិក។
នាថ្ងៃដដែលនោះ ការបាញ់បង្ហោះយានអវកាស SpaceX ក៏មិនទទួលបានលទ្ធផលជោគជ័យ ពោល ៤នាទីក្រោយការបាញ់បង្ហោះ យានអវកាសមួយនោះស្រាប់តែផ្ទុះ ដោយមិនទាន់ចូលដល់លំហអាកាសផង។
ដោយឡែក Twitter វិញទទួលបានការរិះគន់ជាខ្លាំង បន្ទាប់ពីអតីតមហាសេដ្ឋីមានបំផុតលើលោក ដកសញ្ញា Blue Check ចេញពីគណនីជាច្រើន ដែលធ្វើឲ្យតារាល្បីៗជាច្រើនបញ្ចេញប្រតិកម្មគ្រប់ៗគ្នា។
សូមជម្រាបដែរថា បើទោះជារបូតលុយអស់ច្រើនសន្ធឹក តែ Elon Musk នៅតែជាមហាសេដ្ឋីមានបំផុតលើលោក លេខរៀងទី ២ ដោយមានមហាសេដ្ឋីបារាំង Bernard Arnault ជាអ្នកមានបំផុតលើលោក៕
