ក្រុមហ៊ុន Tesla Inc បានបង្កើនកញ្ចប់ថវិកាសម្រាប់ចំណាយនាឆ្នាំ ២០២៣ ដើម្បីអាចប្រកួតប្រជែងលើទីផ្សាររថយន្ត ក៏ដូចជាបង្កើនទិន្នផលផលិតរបស់ខ្លួនឲ្យកាន់តែច្រើន ដ្បិតរថយន្តអគ្គិសនីកំពុងមានទីផ្សារខ្លាំង។
យោងតាមការចុះផ្សាយពី CNA បានបង្ហាញថា ក្រុមហ៊ុនរបស់ Elon Musk រំពឹងចាយលុយចន្លោះពី ៧ ទៅ ៩ពាន់លានដុល្លារនាឆ្នាំនេះ ខណៈកាលពីឆ្នាំទៅពួកគេចាយត្រឹម ៦ ដល់ ៨ពាន់លានដុល្លារប៉ុណ្ណោះ។
ដោយឡែក ទំហំចំណាយចន្លោះពី ៧ ទៅ ៩ពាន់លានដុល្លារនេះទៀតសោត គឺនឹងរំពឹងរក្សាលំនឹងរហូតដល់ ២ឆ្នាំខាងមុខផងដែរ។
សូមជម្រាបដែរថា ក្រុមហ៊ុនរថយន្តអគ្គិសនីមានបំផុតមួយនេះ កំពុងសម្រុកផលិតរថយន្តយ៉ាងចាស់ដៃ បន្ទាប់ពីផ្លាស់ប្ដូរយុទ្ធសាស្ត្រយកអត្រាលក់រថយន្តជាអាទិភាព ជាងប្រាក់ចំណេញ ជាមួយក្ដីរំពឹងរបស់ Elon Musk ក្នុងការលក់រថយន្តឲ្យបាន ២០ លានគ្រឿង ត្រឹមឆ្នាំ ២០៣០។
បើសិនជាមហាសេដ្ឋីអាមេរិកសម្រេចបានក្ដីប្រាថ្នាមួយនេះ នោះ Tesla នឹងក្ដោបក្ដាប់ទីផ្សាររថយន្តទូទាំងពិភពលោកប្រមាណ ២០% និងធ្វើឲ្យ Tesla ក្លាយជាក្រុមហ៊ុនរថយន្តធំបំផុតប្រចាំប្រវត្តិសាស្ត្រ៕
