ក្រុមហ៊ុន ទឹកត្រីង៉ូវហេងកំពត របស់ឧកញ៉ា ចាន់ ស៊ីថា ត្រូវបានលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ចុះហត្ថលេខា និងប្រថាប់ត្រានៃក្រសួងពាណិជ្ជកម្ម ដើម្បីជាសក្ខីភាពទទួលម៉ាកសញ្ញាសម្គាល់ភូមិសាស្រ្ត ទឹកត្រីកំពត-កែប កាលពីថ្ងៃទី២៥ ខែមេសា ឆ្នាំ២០២៣ ហើយត្រូវបានប្រកាសជាផ្លូវការនៅថ្ងៃ ២៦ខែមេសា ម្សិលមិញ។
តាមរយៈគណនីហ្វេសប៊ុកផ្លូវការរបស់ក្រុមហ៊ុន ទឹកត្រីង៉ូវហេងកំពត បានអំពាវនាវដល់ប្រជាពលរដ្ឋជួយគាំទ្រនិងផ្តល់តម្លៃលើកទឹកចិត្តដល់ផលិតផលសម្គាល់ភូមិសាស្រ្តទាំងអស់គ្នា។ ក្រុមហ៊ុនបានគូសបញ្ជាក់ថា នេះជាការលើកទឹកចិត្ត និងជំរុញអោយពិភពលោកបានស្គាល់ពីផលិតផលខ្មែរយើងកាន់តែច្រើន។
ឧកញ៉ា ចាន់ ស៊ីថា បានប្រឡូកក្នុងវិស័យកែច្នៃចំណីអាហារក្នុងស្រុកជាច្រើនឆ្នាំមកហើយ ខណៈដែលលោកបានបង្កើតក្រុមហ៊ុនជាផ្លូវការ កាលឆ្នាំ២០០៧។ ក្រុមហ៊ុន អ៊ីឆេ ង៉ូវហេង ហ្វូដ ប្រូដាក់សិន ដែលមានទីតាំងនៅខេត្តកំពត កំពុងផលិតនូវផលិតផលមួយចំនួនដូចជា ទឹកត្រីធម្មជាតិ ទឹកស៊ីអ៊ីវ ទឹកប្រេងខ្យង ម្រេច និងអំបិល ផងដែរ។
រយៈពេលជាង ២៨ឆ្នាំមកនេះ ក្រុមហ៊ុនទឹកត្រីង៉ូវហេងកំពត ទទួលបានស្តង់ដារជាតិមុនគេក្នុងខេត្តកំពត នាឆ្នាំ២០០៣, បានទទួលគម្រោងអភិវឌ្ឍន៍ TDF ក្នុងឆ្នាំ២០០៩, ទទួលបានមេដាយក្នុងការប្រកួតប្រជែងកែច្នៃកសិកម្ម និងបានបង្កើតផ្សារង៉ូវហេងកំពតក្នុងឆ្នាំ២០១៧, ទទួលបានពានចំនួន៥ ពីក្រសួងរ៉ែនិងថាមពល និងទទួលបានស្តង់ដារសុវត្ថិភាពចំណីអាហារអន្តរជាតិ HCCAP នៅឆ្នាំ២០១៨ និងទទួលបានស្តង់ដារហាឡាលកម្ពុជាពីអគ្គនាយកដ្ឋាន ក.ប.ប. នៃក្រសួងពាណិជ្ជកម្មថែមទៀត៕
