អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា យល់ឃើញថា ក្រោយចប់សម័យប៉ុលពត នៅឆ្នាំ១៩៨០ ប្រទេសកម្ពុជា មានផលិតផលក្នុងស្រុកសរុប (GDP) ក្នុងកម្រិតមួយទាបខ្លាំង ខណៈដែលប្រជាជន រស់នៅស្ថិតក្នុងស្ថានភាពលំបាកមែនទែន ប៉ុន្តែបច្ចុប្បន្ននេះ GDP កម្ពុជា បានកើនដល់ ១៧៨៤ដុល្លារក្នុងមនុស្សម្នាក់ៗ ដែលធ្វើឱ្យប្រជាពលរដ្ឋ មានលទ្ធភាពរស់នៅដោយថ្លៃថ្នូរ និងសុខសប្បាយ។
ថ្លែងនៅក្នុងពិធីពិសាអាហារសាមគ្គី ជាមួយសមាជិក សមាជិកា សភាពាណិជ្ជកម្មកម្ពុជា អាណ្តិតទី៥ ទូទាំងប្រទេស កាលថ្ងៃទី១៤ ខែឧសភា ឆ្នាំ២០២៣ ស្ថិតនៅមណ្ឌលសន្និបាត និងពិព័រណ៍កោះពេជ្រ អគារ ABCD ក្រោមអធិបតីភាពដ៏ខ្ពង់ខ្ពស់ ឯកឧត្តមបណ្ឌិត ហ៊ុន ម៉ាណែត បេក្ខភាពអនាគតនាយករដ្ឋមន្រ្តីបន្តវេន អ្នកឧកញ៉ា គិត ម៉េង បានលើកឡើងថា នៅឆ្នាំ១៩៨០ បើយើងនិយាយពីផលិតផលក្នុងស្រុកសរុប (GDP) គឺ ៧១៦លានដុល្លារ ហើយ GDP ម្នាក់ៗប្រមាណខ្ទង់ ៣០០ដុល្លារ ប៉ុន្តែមកដល់ពេលនេះ គិតត្រឹមឆ្នាំ២០២២ គឺ GDP យើងកើនដល់ ១៧៨៤ដុល្លារ ក្នុងមនុស្សម្នាក់ៗ ហើយបើនិយាយជារួមសម្រាប់សេដ្ឋកិច្ចកម្ពុជា គឺ២៧ប៊ីលានដុល្លារ ដូច្នេះធ្វើឱ្យប្រជាជនកម្ពុជា មានលទ្ធភាពរស់ដោយថ្លៃថ្នូរ និងសុខសប្បាយ ក្រោមការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីជាបិតាសន្តិភាព។
ពិធី «ពិសាអាហារសាមគ្គី ជាមួយសមាជិក សមាជិកា សភាពាណិជ្ជកម្មកម្ពុជា អាណ្តិតទី៥ ទូទាំងប្រទេស» កាលពីល្ងាចម្សិលមិញនេះ ក្រោមគំនិតផ្តួចផ្តើមផ្ទាល់ពីអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ក្នុងគោលបំណងដើម្បីបង្ហាញពីសាមគ្គីភាពរវាងសមាជិក សមាជិកានៃ សភាពាណិជ្ជកម្មកម្ពុជាទូទាំងប្រទេស ជាមួយសមាគមធុរកិច្ចជាតិនិងអន្តរជាតិ បង្កើនចំណងមេត្រីភាពកាន់តែល្អប្រសើរឡើងរវាងដៃគូរដ្ឋាភិបាលនិងឯកជន។ ជាពិសេសក្នុងឱកាសនេះ ដើម្បីទទួលបាននូវអនុសាសន៍និងការចែករំលែកនូវព័ត៌មានស្តីពីធុរកិច្ចនិងវិនិយោគផ្សេងៗ ដែលឆ្លុះបញ្ជាក់ពីការរួមគ្នារវាងវិស័យរដ្ឋាភិបាល-វិស័យឯកជនក្នុងកិច្ចសហការរួមគ្នា ដើម្បីសម្របសម្រួលសកម្មភាពធុរកិច្ចនិងវិនិយោគ និងការអភិវឌ្ឍសម្រាប់កំណើនសេដ្ឋកិច្ចនៅកម្ពុជា ជាមួយគ្នានេះដែរ បង្ហាញពីសកម្មភាពសម្រេចបាននាពេលកន្លងមក និងទិសដៅរបស់សភាពាណិជ្ជកម្មកម្ពុជា។
សូមជម្រាបថា យោងតាមការព្យាករណ៍របស់ក្រសួងសេដ្ឋកិច្ច និងហិរញ្ញវត្ថុ សេដ្ឋកិច្ចកម្ពុជានៅឆ្នាំ២០២៣នេះ ត្រូវបានព្យាករថានឹងងើបឡើងវិញ ហើយរំពឹងថានឹងសម្រេចបានកំណើនក្នុងរង្វង់ ៦,៦% ដែលធ្វើឱ្យ GDP (ផសស) សម្រាប់មនុស្សម្នាក់ៗ នឹងអាចកើនដល់ ១៩២៤ដុល្លារអាមេរិកបន្ថែមទៀតផងដែរ៕
