ប្រទេសឥណ្ឌូនេស៊ី បានធ្វើការនាំចេញសត្វមាន់រស់ជាលើកដំបូង ទៅកាន់ប្រទេសសិង្ហបុរី កាលពីថ្ងៃទី ១៣ ខែឧសភា ក្នុងចំនួនសរុប ២៣ ០៤០ ក្បាល ឬប្រមាណ ៤១,៤ តោន។ នេះបើតាមការចុះផ្សាយពីសារព័ត៌មាន VNA ។
ក្នុងសេចក្តីថ្លែងការណ៍ជាលាយលក្ខណ៍អក្សរមួយ បានប្រកាសកាលពីថ្ងៃទី ១៤ ខែឧសភា ដោយឯកអគ្គរដ្ឋទូតឥណ្ឌនេស៊ី ប្រចាំប្រទេសសិង្ហបុរី លោក Surya Pratomo បានបង្ហាញថា ការនាំចេញនេះ គឺជាភស្តុភាងដ៏សំខាន់មួយ ក្នុងការបង្កើនកិច្ចសហប្រតិបត្តិការពាណិជ្ជកម្មរវាងប្រទេសទាំងពីរ ។
គួរឱ្យដឹងផងដែរថា ឥណ្ឌូនេស៊ី បាននិងកំពុងធ្វើការនាំចេញសាច់មានក្លាសេ និងផលិតផលសាច់មានកែច្នៃ ទៅកាន់ប្រទេសសិង្ហបុរី រួចមកហើយ ចាប់តាំងពីខែមិថុនា ឆ្នាំមុនមក ។
យ៉ាងណាមិញ បើតាមឯកអគ្គរដ្ឋទូតរូបនេះ បាននិយាយទៀតថា មាន់រស់ ដែលត្រូវបាននាំចូលមកពីឥណ្ឌូនេស៊ី ត្រូវបានបញ្ជាក់យ៉ាងច្បាស់លាស់ថា គ្មានមេរោគផ្តាសាយបក្សីនោះឡើយ ដូច្នេះពួកគេអាចដឹកជញ្ជូនដោយផ្ទាល់ទៅកាន់ប្រទេសិង្ហបុរីបាន ចំពេលឥណ្ឌូនេស៊ី នឹងព្យាយាមខិតខំបន្ថែមទៀត ដើម្បីបន្តធ្វើអ្នកផ្គត់ផ្គង់សាច់មាន់ សម្រាប់ប្រទេសិង្ហបុរី នៅពេលតម្រូវការកំពុងមានការកើនឡើងខ្លាំង ។
នៅក្នុងឆ្នាំ ២០២២ កន្លងទៅ សិង្ហបុរី បាននាំចូលមាន់រស់ សាច់មាន់កែច្នៃ និងផលិតផលពាក់ព័ន្ធទៅនឹងមាន់ ប្រមាណ ២២៨ ០០០ តោន ខណ:ប្រេស៊ីល គឺជាអ្នកផ្គត់ផ្គង់ធំបំផុត ដោយមានចំណែក ៥១% ស្របពេលម៉ាឡេស៊ី មាន ២៤% និងសហរដ្ឋអាមេរិកមាន ១១% ។
ជម្រាបជូនផងដែរថា រដ្ឋាភិបាលសិង្ហបុរី នៅមួយរយ:ពេលចុងក្រោយនេះ បានផ្តល់ជូននូវវិញ្ញាបនបត្រទៅដល់ក្រុមហ៊ុនផលិតសាច់មាន់ និងក្រុមហ៊ុនកែច្នៃមួយចំនួន នៅក្នុងប្រទេសឥណ្ឌូនេស៊ី ដើម្បីជំរុញដល់ការនាំចូលមកកាន់ប្រទេសខ្លួន ចាប់តាំងពីខែមិថុនា ឆ្នាំ ២០២២ មក ស្របពេលជំហានថ្មីនេះ ត្រូវបានធ្វើឡើង នៅពេលដែលសិង្ហបុរី បានជួបប្រទះទៅនឹងកង្វះខាតក្នុងការផ្គត់ផ្គង់សាច់មាន់ បន្ទាប់ពីម៉ាឡេស៊ី បានធ្វើការផ្អាកការនាំចេញសត្វមាន់រស់របស់ខ្លួនជាបណ្តោះអាសន្ន ៕
