នាយករដ្ឋមន្ត្រីថ្មីរបស់ប្រទេសនូវែលសេឡង់ លោក Chris Hipkins បាននិយាយថា លោកនឹងបំពេញទស្សនកិច្ចទៅកាន់ប្រទេសចិន ចំនួន៥ថ្ងៃគឺចាប់ពីថ្ងៃទី ២៥ ដល់ថ្ងៃទី ៣០ មិថុនាខាងមុខ។ ក្នុងនោះលោកនឹងដឹកនាំគណៈប្រតិភូ ដែលជាក្រុមហ៊ុនខ្នាតយក្សប្រចាំប្រទេសទៅជាមួយផង។
យោងតាមការចុះផ្សាយពី CNA បានឲ្យដឹងថា លោក Hipkins នឹងជួបពិភាក្សាការងារជាមួយប្រធានាធិបតីចិន ស៊ី ជិនពីង ទន្ទឹមនឹងនោះក៏នឹងជួបជាមួយនាយករដ្ឋមន្ត្រី លោក Li Qiang និងជួបប្រធានគណៈកម្មាធិការអចិន្ត្រៃយ៍ នៃសភាប្រជាជនជាតិ លោក Zhao Leji ក្នុងអំឡុងពេលទស្សនកិច្ចនាទីក្រុងប៉េកាំង។
នាយករដ្ឋមន្ត្រីថ្មីនូវែលសេឡង់រូបនេះបាននិយាយបន្តថា៖ ខ្ញុំទន្ទឹងរង់ចាំជួបជាមួយថ្នាក់ដឹកនាំរបស់ប្រទេសចិន តាមរយៈកិច្ចប្រជុំទ្វេភាគីនានា ក្រោមប្រធានបទដូចជា ការប្រែប្រួលអាកាសធាតុ ស្ថិរភាពសេដ្ឋកិច្ច សន្តិសុខក្នុងតំបន់ និងពិភពលោក សិទ្ធិមនុស្ស ខណៈបញ្ហាសង្រ្គាមនៅអ៊ុយក្រែន ក៏នឹងត្រូវយកមកជជែកគ្នាដែរ។
សូមជម្រាបជូនដែរថា ប្រទេសចិនគឺជាទីផ្សារនាំចេញធំបំផុតរបស់នូវែលសេឡង់ ពោលកាលពីឆ្នាំ ២០២២ ពួកគេបាននាំទំនិញទៅកាន់មហាអំណាចសេដ្ឋកិច្ចទី ២ លើលោក ប្រហែល ២០ពាន់លានដុល្លារ៕
