នាថ្ងៃពុធទី ១២ ខែកក្កដា គណៈកម្មាការរៀបចំការបោះឆ្នោតថៃ ហៅកាត់ EC បានផ្ដល់អនុសាសន៍ឲ្យមានការផ្អាកភាពជាសមាជិកសភារបស់មេគណបក្សឆ្ពោះទៅមុខ (MFP) គឺលោក ភីថា លីមចារើនរ៉ាត់ ក្រោយចោទប្រកាន់ថា បានបំពានច្បាប់ឃោសនារកសន្លឹកឆ្នោត។
យោងតាមការចុះផ្សាយពីសារព័ទ៌មាន Barrons បានបង្ហាញថា សេចក្ដីប្រកាសមួយនេះធ្វើឡើងមុនការបោះឆ្នោតរើសនាយករដ្ឋមន្ត្រីថៃ ដោយសភាតែមួយថ្ងៃប៉ុណ្ណោះ ពោលការសម្រេចជ្រើសតាំងថ្នាក់ដឹកនាំថ្មី នឹងធ្វើឡើងនាថ្ងៃទី ១៣ ខែកក្កដាខាងមុខ។
រំលឹកបន្តិចថា កន្លងមកបេក្ខភាពដែលទទួលបានសម្លេងគាំទ្រច្រើនបំផុត សម្រាប់ការបោះឆ្នោតសកលកាលពីឧសភា ជួបបញ្ហាមិនចេះជាប់មិនចេះហើយ ពោលកាលពីខែមុន EC ធ្លាប់បានបើកការស៊ើបអង្កេតពិសេសលើលោក ភីថា ដើម្បីស្វែងរកថា តើលោកអាចមានមានលក្ខណៈសម្បត្តិគ្រប់គ្រាន់ ក្នុងការចូលកាន់តំណែងជានាយករដ្ឋមន្ត្រីឬអត់។
បច្ចុប្បន្ន EC បានបញ្ជូនសំណុំរឿងមួយនេះទៅកាន់តុលាការធម្មនុញ្ញដើម្បីកាត់ក្ដី ខណៈលោកភីថា នឹងត្រូវចូលខ្លួនតាមការកោះហៅនាថ្ងៃស្អែកនេះ។
ជម្រាបបន្ថែមថា ក្រោមច្បាប់រដ្ឋធម្មនុញ្ញរបស់ប្រទេសថៃ បើទោះជាលោកភីថា ត្រូវបានព្យួរឈ្មោះជាសមាជិកសភាក៏ដោយ ប៉ុន្តែលោកនៅតែអាចឈរឈ្មោះជានាយករដ្ឋមន្ត្រីបានដដែល៕
