នាថ្ងៃទី ១៤ ខែកក្កដានេះ ប្រមុខការទូតចិន លោក Wang Yi បានទទូចឲ្យរដ្ឋាភិបាលក្រុងវ៉ាស៊ីងតោន ព្យាយាមធ្វើការជាមួយចិន បើសិនចង់ស្ដារទំនាក់ទំនងរវាងមហាអំណាចសេដ្ឋកិច្ចទាំង ២ឡើងវិញ។
យោងតាមការចុះផ្សាយពីសារព័ត៌មានសិង្ហបុរី CNA បានបង្ហាញថា អំឡុងពេលចូលរួមកិច្ចប្រជុំរដ្ឋមន្ត្រីការបរទេសអាស៊ាន ប្រមុខការទូតចិន ក៏ឆ្លៀតបើកកិច្ចប្រជុំក្រៅផ្លូវការជាមួយប្រមុខការទូតអាមេរិក Antony Blinken ផងដែរ ដោយជជែកគ្នាពីស្ថានភាពទំនាក់ទំនងរវាងអាមេរិក និងចិន ដែលកំពុងតឹងសសៃកដាក់គ្នា។
នៅក្នុងកិច្ចប្រជុំរវាងប្រមុខការទូតមហាអំណាចទាំង ២ លោក Wang និយាយថា៖ អាមេរិកចាំបាច់ត្រូវប្រកាន់យកវិធីសាស្រ្តសមហេតុសមផល និងជាក់ស្តែង ធ្វើការជាមួយប្រទេសចិនក្នុងទិសដៅតែមួយ ទើបអាចស្ដារទំនាក់ទំនងប្រទេសទាំង ២ឡើងវិញ។
បន្ថែមពីនោះ អតីតរដ្ឋមន្ត្រីការបរទេសចិនរូបនេះ ថែមទាំងបានសង្កត់ធ្ងន់ទៀតថា សហរដ្ឋអាមេរិកត្រូវតែបញ្ឈប់ជាបន្ទាន់ ចំពោះការលូកដៃចូលបញ្ហាផ្ទៃក្នុងរបស់ចិន ដែលលោកចង់សំដៅលើបញ្ហាកោះតៃវ៉ាន់។
សូមជម្រាបដែរថា ប៉ុន្មានឆ្នាំចុងក្រោយនេះ អាមេរិក និងចិនបានពាក់មុខយក្សដាក់គ្នាកាន់តែខ្លាំង ក្រោយអាមេរិកព្យាយាមរឹតបន្តឹងលើការធ្វើពាណិជ្ជកម្មរបស់ចិន ផ្គត់ផ្គង់ជំនួយសព្វាវុធទៅកាន់កោះតៃវ៉ាន់ និងលូកដៃពីបញ្ហាសមុទ្រចិនខាងត្បូង៕
