អ្នកឧកញ៉ា លី យ៉ុងផាត់ អនុញ្ញាតឱ្យក្រុមការងារផលិតភាពយន្តខ្មែរខ្នាតធំ លើទុន២០ម៉ឺនដុល្លារ ចូលថតនៅសួនសត្វភ្នំពេញសាហ្វារី

អ្នកឧកញ៉ា លី យ៉ុងផាត់ អគ្គនាយកក្រុមហ៊ុន LYP Group បានអនុញ្ញាតឱ្យក្រុមការងារផលិតភាពយន្តខ្នាតធំ រឿងភាគខ្មែរ របស់ស្ថានីយ៍ទូរទស្សន៍ PNN ចូលថតនៅសួនសត្វភ្នំពេញសាហ្វារី ដែលជាសួនសត្វខ្នាតអន្តរជាតិ និងមានតែមួយគត់នៅរាជធានីភ្នំពេញ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោកស្រី ទូច បុប្ផា ហៅ ធីតា អ្នកគ្រប់គ្រងការផ្សាយ និងគ្រប់គ្រងការផលិតភាពយន្តខ្មែរ នៅស្ថានីយ៍ទូរទស្សន៍ PNN បានថ្លែងប្រាប់ ឧកញ៉ា ញូស៍ ថាមូលហេតុដែលអ្នកឧកញ៉ា លី យ៉ុងផាត់ អនុញ្ញាតឱ្យក្រុមការងារចូលថតនៅសួនសត្វភ្នំពេញសាហ្វារី គឺដោយសារអ្នកឧកញ៉ា មើលឃើញថាខ្លឹមសារនៃសាច់រឿងនេះ គឺនឹងចូលរួមចំណែកឱ្យអ្នកទស្សនា ជួយគាំទ្រ ស្រឡាញ់ធម្មជាតិ និងសត្វព្រៃ។ ម្យ៉ាងទៀត ដោយសារសួនសត្វសាហ្វារី ជាសួនសត្វខ្នាតអន្តរជាតិ និងមានតែមួយគត់នៅរាជធានីភ្នំពេញ ដែលក្រោមការវិនិយោគរបស់ក្រុមហ៊ុន LYP Group ហើយក៏យល់ឃើញថា ដើម្បីរួមចំណែកឱ្យភាពយន្តខ្មែរកាន់តែល្អ និងបង្ហាញថា នៅប្រទេសខ្មែរយើង អាចផលិតភាពយន្តខ្នាតធំ ព្រមទាំងមានចម្រុះជាមួយសត្វផ្សេងៗទៀតបានផងដែរ។

លោកស្រី ទូច បុប្ផា បានឱ្យដឹងទៀតថា រឿងសុបិនស្នេហ៍ឆ្លងឋាន នេះ គឺក្រុមហ៊ុនបានវិនិយោគលើទឹកប្រាក់ប្រមាណខ្ទង់ជាង ២០ម៉ឺនដុល្លារអាមេរិក និងប្រើប្រាស់ពេលថតជាង ១ឆ្នាំ។ រឿងភាគថ្មីនេះ គ្រោងនឹងចាក់ផ្សាយនៅត្រីមាសទី៣ នៃឆ្នាំ២០២៣នេះ ហើយនឹងថ្ងៃចាក់ផ្សាយលើទូរទស្សន៍ PNN ចាប់ពីថ្ងៃចន្ទ ដល់ថ្ងៃព្រហស្បតិ៍ វេលាម៉ោង ៨ ដល់ម៉ោង ៩យប់។

សូមជម្រាបថា សួនសត្វភ្នំពេញសាហ្វារី ជាសួនសត្វដែលបានផ្តល់នូវទីជម្រកដល់សត្វក្នុងស្រុក ក៏ដូចជាសត្វព្រៃជាច្រើនប្រភេទ ជាមួយកន្លែងរស់នៅធំទូលាយបែបធម្មជាតិ និងផ្តល់ចំណីអាហារយ៉ាងសំបូរបែប។ សួនសត្វនេះ បង្កើតឡើងឆ្នាំ២០១៨ ចំណាយទុនជាង ១០លានដុល្លារ និងមានទីតាំងនៅផ្លូវលីយ៉ុងផាត់ និងមានចម្ងាយប្រមាណ ២១គីឡូម៉ែត្រពីវត្តភ្នំ៕