កាលពីថ្ងៃអង្គារកន្លងទៅ ក្រុមហ៊ុន Taiwan Semiconductor Manufacturing Co. បានបង្ហាញពីកិច្ចព្រមព្រៀងស្តីពីគម្រោងសាងសង់រោងចក្រផលិតបន្ទះឈីបដំបូងរបស់ខ្លួននាទឹកដីអឺរ៉ុបក្នុងទីក្រុង Dresden ប្រទេសអាឡឺម៉ង់។ នេះបើតាមការចុះផ្សាយដោយសារព័ត៌មាន Nikkei Asia ។
ក្រុមហ៊ុនបាននិយាយថា ខ្លួននឹងដាក់ទុនប្រមាណ ៣,៨៨ពាន់លានដុល្លារ ឬស្មើរនឹង ៧០%នៃភាគហ៊ុនរបស់ក្រុមហ៊ុន European Semiconductor Manufacturing Co.។
ក្នុងនោះដែរ ដៃគូបណ្តាក់ទុនវិនិយោគចំនួន ៣ទៀត រួមមានក្រុមហ៊ុន Infineon Technologies, ក្រុមហ៊ុន Robert Bosch និងក្រុមហ៊ុន NXP Semiconductors នឹងកាន់កាប់ភាគហ៊ុន ១០%រៀងគ្នាផងដែរ។
ជាមួយគ្នានោះ ការវិនិយោគសរុបនៅក្នុងគម្រោងនេះ ត្រូវបានគេរំពឹងថានឹងលើសពី ១០ពាន់លានដុល្លារ ក្រោមការគាំទ្រពីសហភាពអឺរ៉ុប និងរដ្ឋាភិបាលប្រទេសអាឡឺម៉ង់។
ដោយឡែក ការសាង់សង់រោងចក្រនេះគ្រោងនឹងចាប់ផ្តើមនៅពាក់កណ្តាលឆ្នាំ ២០២៤ និងអាចបង្កើតការងារបានចំនួន ២០០០កន្លែង ខណៈដែលការផលិតវិញនឹងចាប់ផ្តើមនៅចុងឆ្នាំ ២០២៧ឯណោះ៕
