ថ្មីៗនេះ ក្រុមហ៊ុនអភិវឌ្ឍចលនទ្រព្យ Hongkong Land បានចេញមុខបដិសេធចំពោះរបាយការណ៍ថា ខ្លួនកំពុងដាក់លក់អគារការិយាល័យដ៏ល្បីល្បាញបំផុតមួយ នៅចំកណ្តាលសង្កាត់ហិរញ្ញវត្ថុ ក្នុងទីក្រុងហុងកុង។ នេះបើតាមការចុះផ្សាយពីសារព័ត៌មាន CNA ។
ជុំវិញការចេញមុខបដិសេធនេះ ត្រូវបានធ្វើឡើង បន្ទាប់ពីសារព័ត៌មាន Sing Tao Daily បានធ្វើការរាយការណ៍នៅថ្ងៃពុធនេះថា Hongkong Land កំពុងស្វែងរកការលក់អគារ Three Exchange Square ដែលស្ថិតនៅក្នុងសង្កាត់ហិរញ្ញវត្ថុ Central ជាមួយតម្លៃស្នើសុំប្រមាណ ២,០៥ពាន់លានដុល្លារ។
យ៉ាងណាមិញ អ្នកនាំពាក្យរបស់ Hongkong Land បាននិយាយនៅក្នុងសេចក្តីថ្លែងការណ៍មួយថា ៖ ” នេះគ្រាន់តែជាពាក្យចចាមអារ៉ាមប៉ុណ្ណោះ។ Hongkong Land មិនមានគម្រោងលក់អគារណាមួយ នៅក្នុងសង្កាត់ Central នោះឡើយ ” ។
ជម្រាបជូនផងដែរថា Three Exchange Square គឺជាអគារការិយាល័យកម្រិត A ដែលមានកម្ពស់ ៣៣ ជាន់ ហើយអគារនេះត្រូវបានជួលដោយក្រុមហ៊ុនធំៗ ដូចជា S&P Global Inc. និង China Merchants Bank Co ជាដើម។ ស្របពេល Hongkong Land គឺជាម្ចាស់នៃអគារពាណិជ្ជកម្មធំៗជាច្រើន នៅសង្កាត់ Central ក្នុងទីក្រុងហុងកុង ៕
