លោកឧកញ៉ា ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប បានអំពាវនាវដល់អ្នកមានធនធាន អ្នកឧកញ៉ា ឧកញ៉ា គួរចែករំលែកធនធានរបស់ខ្លួនតាមដែលអាចធ្វើបាន ទៅជួយវិនិយោគលើវិស័យអប់រំ ដើម្បីកសាងធនធានមនុស្សរបស់កម្ពុជា ឱ្យមានចំណេះដឹង ជំនាញ ឱ្យបានកាន់តែច្រើន និងដើម្បីភាពរីកចម្រើនលើគ្រប់វិស័យ ព្រោះវិស័យណាក៏ដោយ សុទ្ធតែត្រូវការធនធានមនុស្ស។
ឧកញ៉ា ប៉ិច បូឡែន បានថ្លែងក្នុងបទសម្ភាសន៍មួយ កាលពីថ្ងៃទី១០ ខែសីហា ម្សិលមិញថា លោកតែងតែស្នើសុំ ដល់អ្នកមានធនធាន រួមទាំងអ្នកឧកញ៉ា ឧកញ៉ា ដែលកំពុងវិនិយោគលើវិស័យណាក៏ដោយ បើសិនជាអាច សូមជួយចែករំលែកធនធានខ្លះ ដើម្បីវិនិយោគលើវិស័យអប់រំបណ្តុះបណ្តាល។ លោកបន្តថា មានអ្នកខ្លះគិតថា ការវិនិយោគលើវិស័យអប់រំ ពុំសូវទទួលបានផលចំណេញច្រើន ប៉ុន្តែបច្ចុប្បន្ននេះពួកគាត់អាចដូរការគិតខ្លះហើយ ព្រោះថាគ្មានវិស័យណាអាចរីកចម្រើនបាន ដោយរំលងវិស័យអប់រំនោះទេ។ អ្នកខ្លះគាត់គិតថា គាត់មិនស្រឡាញ់ គាត់មិនវិនិយោគ ប៉ុន្តែគាត់កំពុងវិនិយោគលើវិស័យធនាគារ កម្មន្តសាល កសិកម្ម ឬវិស័យទេសចរណ៍ ប៉ុន្តែកំពុងអង្គុយរអូររាល់ថ្ងៃថាខ្វះបុគ្គលិកធ្វើការ ឬខ្វះបុគ្គលិកមានចំណេះជំនាញ។
ប្រធានសមាគមសហគ្រិនវ័យក្មេងកម្ពុជា បានបន្ថែមថា៖ “ដូច្នេះសួរថា តើអាចទទួលបានបុគ្គលិកមានចំណេះជំនាញរបៀបណា បើគាត់មិនបានចូលរួមចំណែកវិនិយោគលើវិស័យអប់រំបណ្តុះបណ្តាល? ទោះតិច ឬច្រើន គួរតែចូលរួមវិនិយោគមក ដើម្បីបានកម្លាំងពលកម្មល្អមួយ សម្រាប់វិស័យខ្លួនឯង។ ដូច្នេះខ្ញុំសូមអំពាវនាវតែម្តង អ្នកដែលមានធនធាន គួរតែសម្លឹងមើលខាងវិស័យអប់រំ ហើយចូលរួមទៅតាមធនធានដែលយើងអាចធ្វើបាន គ្រប់សកម្មភាពទាំងអស់ ដើម្បីកសាងធនធានមនុស្សរបស់យើង ព្រោះបើធនធានមនុស្សយើងទន់ ខ្ញុំមិនដឹងថាវិស័យណា អាចរឹងទៅរួចទេ ព្រោះគ្រប់វិស័យត្រូវការឆ្លងកាត់មនុស្សទាំងអស់ ទោះបីយើងនិយាយថាបច្ចេកវិទ្យា ឬ IA ក៏ត្រូវការមនុស្សដើម្បីបង្កើត និងដើម្បីប្រើប្រាស់ដែរ”។
សូមជម្រាបថា រាជរដ្ឋាភិបាលកម្ពុជា បានកំណត់គោលដៅក្នុងការផ្លាស់ប្តូរពីប្រទេសមានចំណូលមធ្យមកម្រិតទាប ក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសអភិវឌ្ឍន៍នៅឆ្នាំ២០៥០ ដូច្នេះការពង្រឹង និងការអភិវឌ្ឍវិស័យអប់រំ ជាកត្តាអាទិភាពមួយ សម្រាប់ធ្វើឱ្យគោលដៅនេះសម្រេចបានជោគជ័យ ដោយពឹងផ្អែកលើសមត្ថភាពរបស់ប្រជាជន ដែលមានចំណេះដឹង និងជំនាញពាក់ព័ន្ធ ចូលរួមបំពេញការងារឱ្យបានល្អ លើគ្រប់វិស័យទាំងអស់៕
