លោកស្រីឧកញ៉ា កែវ មុំ ស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន លីលី ហ្វ៊ូដ អ៊ិនដាសទ្រី ខូអិលធីឌី ត្រូវបានសមាជិកក្រុមប្រឹក្សាភិបាលនៃសភាមុខរបរ និងមីក្រូសហគ្រាសកម្ពុជា (CPMEC) បោះឆ្នោតគាំទ្រឱ្យជាប់ជា ប្រធានសភាមុខរបរ និងមីក្រូសហគ្រាសកម្ពុជា ក្នុងអាណត្តិទី៤ នីតិកាលទី២ កាលពីថ្ងៃទី១១ ខែសីហា ឆ្នាំ២០២៣។
ឧកញ៉ា កែវ មុំ បានថ្លែងអំណរគុណដល់សមាជិកក្រុមប្រឹក្សាភិបាលនៃសភាមុខរបរនិងមីក្រូសហគ្រាសកម្ពុជា (CPMEC) ដែលបានផ្ដល់ទំនុកចិត្តដល់លោកស្រី បានបោះឆ្នោតជ្រើសរើសលោកស្រី ជាប្រធាន។ លោកស្រីឧកញ៉ា កែវ មុំ បានឱ្យដឹងថា កម្មវិធីបោះឆ្នោតនេះគឺ មានការចូលរួមឃ្មាំមើលពីក្រសួងឧស្សាហកម្មបច្ចេកវិទ្យា វិទ្យាសាស្រ្ត និងនវានុវត្តន៍ ដែលមានលោក សុន សេងហួត រដ្ឋលេខាធិការជាតំណាង ព្រមទាំងមានសមាជិកសមាជិកា នៃសភាមុខរបរ និងមីក្រូសហគ្រាស មួយចំនួនផងដែរ។
លោកស្រីឧកញ៉ា កែវ មុំ នឹងក្លាយជាប្រធានសភាមុខរបរ និងមីក្រូសហគ្រាសកម្ពុជា នៅអាណត្តិថ្មីនេះ ជំនួសលោកទេសរដ្ឋមន្រ្តី សុន គន្ធរ រដ្ឋមន្រ្តីប្រតិភូអមនាយករដ្ឋមន្រ្តី ដែលជាប្រធាន បានដឹកនាំ CPMEC និងជួយជ្រោមជ្រែងកន្លងមក រហូតដល់បច្ចុប្បន្ន។
សូមជម្រាបថា សភាមុខរបរ និងមីក្រូសហគ្រាសកម្ពុជា ត្រូវបានបង្កើតឡើងដោយព្រះរាជក្រឹត្យ កាលពីថ្ងៃទី២៨ ខែធ្នូ ឆ្នាំ២០០៥។ សភាមុខរបរ និងមីក្រូសហគ្រាសកម្ពុជា មានវិសាលភាពទូទាំងប្រទេសកម្ពុជា ហើយដែលធ្វើសកម្មភាព ដើម្បីបម្រើផលប្រយោជន៍ដល់មុខរបរ និងមីក្រូសហគ្រាស ក្នុងគោលបំណងជំរុញដល់ការអភិវឌ្ឍសេដ្ឋកិច្ច និងសង្គមកិច្ច ជួយបង្កើតធនធានមនុស្ស និងការបង្កើតអាជីវកម្ម តាមរយៈមុខរបរ និងការបណ្តុះបណ្តាលវិជ្ជាជីវៈនៅព្រះរាជាណាចក្រកម្ពុជា។ ក្រុមប្រឹក្សាភិបាល សភាមុខរបរ និងមីក្រូសហគ្រាសកម្ពុជា មានអាណត្តិ ៥ឆ្នាំ៕
