អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា នៅព្រឹកថ្ងៃទី០៤ ខែកញ្ញា នេះ បានដឹកនាំគណៈប្រតិភូសភាពាណិជ្ជកម្មកម្ពុជា ដែលរួមមានអ្នកឧកញ៉ា ឧកញ៉ា ជាច្រើនរូប អញ្ជើញអមដំណើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ទៅចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ នៅសាធារណរដ្ឋឥណ្ឌូនេស៊ី។
ក្នុងឱកាសអញ្ជើញអមដំណើរ សម្តេចធិបតីនាយករដ្ឋមន្ត្រី ទៅចូលរួមកិច្ចប្រជុំកំពូលអាស៊ានលើកទី៤៣ ដែលប្រព្រឹត្តទៅនៅសាធារណរដ្ឋឥណ្ឌូនេស៊ី ចាប់ពីថ្ងៃទី៤ ដល់ថ្ងៃទី៧ ខែកញ្ញា ឆ្នាំ២០២៣ គេឃើញអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានដឹកនាំគណៈប្រតិភូសភាពាណិជ្ជកម្មកម្ពុជាជាច្រើនរូប រួមមាន៖ អនុប្រធានសភាពាណិជ្ជកម្ម អ្នកឧកញ៉ា លឹម ហេង, អ្នកឧកញ៉ា លី ឃុនថៃ, អ្នកឧកញ៉ា ទុយ គី, ឧកញ៉ា សុខ ស្រស់, ឧកញ៉ា លឹម សុជាតិ, បណ្ឌិត តាន់ មុនីវណ្ណ, ឧកញ៉ា ងួន ម៉េងតិច អគ្គនាយកសភាពាណិជ្ជកម្មកម្ពុជា និងលោកស្រីឧកញ៉ា ងួន ពេជ្រសុផល អគ្គនាយករងសភាពាណិជ្ជកម្មកម្ពុជា។
ក្នុងកំឡុងពេលនៃទស្សនកិច្ចនេះ អ្នកឧកញ៉ា គិត ម៉េង និងគណៈប្រតិភូសភាពាណិជ្ជកម្មកម្ពុជា នឹងអញ្ជើញចូលរួមកិច្ចប្រជុំកំពូលធុរកិច្ចនិងវិនិយោគអាស៊ាន កម្មវិធីពានរង្វាន់ធុរកិច្ចអាស៊ានឆ្នាំ២០២៣ កិច្ចពិភាក្សាតុមូលចក្រភពអង់គ្លេស-អាស៊ាន កិច្ចពិភាក្សាតុមូលកាណាដា-អាស៊ាន កិច្ចពិភាក្សាតុមូលស្តីពីកិច្ចព្រៀមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ និងកិច្ចប្រជុំផ្សេងទៀតពាក់ព័ន្ធនឹងការជំរុញធុរកិច្ចនិងវិនិយោគក្នុងតំបន់អាស៊ាន។
ជាមួយគ្នានេះ អ្នកឧកញ៉ា គិត ម៉េង ក្នុងនាមប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា នឹងចុះហត្ថលេខា លើអនុស្សរណៈយោគយល់គា្នសម្រាប់ភាពជាដៃគូ ក្នុងការអភិវឌ្ឍកសិកម្មនិងសហគ្រាសមីក្រូ ធុនតូចនិងមធ្យមកម្ពុជា-ហ្វីលីពីន ជាមួយលោក JOSE MA. A CONCEPCION III ប្រធានក្រុមប្រឹក្សាពិគ្រោះយោបល់ធុរកិច្ច អាស៊ានសម្រាប់ហ្វីលីពីន។ ពិធីចុះអនុស្សរណៈនៃការយោគយល់គ្នានេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងឯកឧត្តម FERDINAND “BONGBONG” ROMUALDEZ MARCOS JR. ប្រធានាធិបតីហ្វីលីពីន៕
