ប្រមុខការទូតចិន លោក វ៉ាង យី នឹងបំពេញទសន្សកិច្ចទៅកាន់ប្រទេសរុស្ស៊ី រយៈពេល ៤ថ្ងៃ ពីថ្ងៃទី១៨ ដល់ថ្ងៃទី២១ ខែកញ្ញា។ នេះបើតាមការចុះផ្សាយពីសារព័ត៌មាន Barron។
ជាមួយគ្នានោះ ក្រសួងការបរទេសចិនក៏បាននិយាយនៅក្នុងសេចក្ដីថ្លែងការណ៍មួយថា លោក វ៉ាង នឹងអញ្ជើញទៅប្រទេសរុស្សី ដើម្បីរៀបចំការពិគ្រោះយោបល់សន្តិសុខជាយុទ្ធសាស្ត្រចិន-រុស្ស៊ី ហៅកាត់ SSCC លើកទី១៨ ពីថ្ងៃទី១៨ ដល់ថ្ងៃទី២១ ខែកញ្ញា ក្រោមការអញ្ជើញពីលេខាធិការនៃក្រុមប្រឹក្សាសន្តិសុខទីក្រុងម៉ូស្គូ លោក Nikolai Patrushev។
គួររំលឹកដែរថា កាលពីខែមុន រដ្ឋមន្ត្រីការពារជាតិចិន លោក Li Shangfu ក៏ធ្លាប់បំពេញទស្សនកិច្ចទៅកាន់រុស្ស៊ី និងបេឡារុស ដោយអំពាវនាវឲ្យបង្កើនកិច្ចសហប្រតិបត្តិការយោធាផងដែរ។
ជម្រាបបន្ថែមថា ចិន និងរុស្ស៊ី គឺជាដៃគូយុទ្ធសាស្ត្រដ៏ជិតស្និទ្ធ ដោយបានចាត់ទុកទំនាក់ទំនងរបស់ពួកគេ គឺគ្មានដែនកំណត់ឡើយ ទាំងកិច្ចសហប្រតិបត្តិការផ្នែកសេដ្ឋកិច្ច និងយោធា ខណៈកាលពីខែមីនាកន្លងទៅ ប្រធានាធិបតីចិន ស៊ី ជិនពីង បានបំពេញទស្សនកិច្ចទៅរុស្ស៊ី ស្របពេលប្រធានាធិបតីរុស្ស៊ី វ៉្លាឌីមៀ ពូទីន ក៏ធ្លាប់បង្ហើបកាលពីខែកក្កដាថា លោកនឹងធ្វើទស្សនកិច្ចទៅចិននាខែតុលាខាងមុខ៕
