លោកឧកញ៉ា ខេមរៈ សិរីមន្ត កំពូលតារាចម្រៀងផលិតកម្ម Galaxy Navatra បានបង្ហើបឱ្យដឹងថា លោកមានបទចម្រៀងពីរទម្រង់ គឺបទបែបប្រពៃណីជាតិខ្មែរ និងបទបែបរាំលេងសប្បាយ លក្ខណៈក្នុងសម័យសង្គមរាស្ត្រនិយម សម្រាប់អបអរសាទរពិធីបុណ្យភ្ជុំបិណ្ឌឆ្នាំនេះ។
ឧកញ៉ា ខេមរៈ សិរីមន្ត បានថ្លែងក្នុងបទសម្ភាសន៍ជាមួយ Oknha News កាលពីចុងសប្តាហ៍កន្លងទៅថា៖ “ថ្ងៃនេះ ជាថ្ងៃថតសម្រាប់ពិធីបុណ្យភ្ជុំបិណ្ឌរបស់យើង ប៉ុន្តែប្លែកពីរាល់ដងដែលយើងតែងថតស្លៀកពាក់បែបសម័យកាលបុរាណ ជាអាវហូល ឬអាវប៉ាក់ ប៉ុន្តែលើកនេះយើងធ្វើឱ្យប្លែកសម្រាប់អបអររាំលេងកម្សាន្តក្នុងពិធីបុណ្យភ្ជុំបិណ្ឌ គឺយើងតុបតែងខ្លួនបែបទសវត្សរ៍ឆ្នាំ៥០ ឬឆ្នាំ៦០ សម័យសង្គមរាស្ត្រនិយម ឬហៅថាសម័យបារាំង។ យើងតុបតែងមើលទៅស្រស់ស្អាតមែនទែន ហើយខ្ញុំក៏ប្លែកអារម្មណ៍ខ្លួនឯងដែរ”។
លោកឧកញ៉ា បន្តថា យើងក៏មានបទសម្រាប់ពិធីបុណ្យភ្ជុំចំតែម្តង គឺមានបទផ្សេងទៀត នៅក្នុងព្រឹត្តិការណ៍ជាមួយគ្នា តែយើងញែកដាច់ជាពីរ។ ដូច្នេះឆ្នាំនេះ យើងមានពីរទម្រង់ គឺទី១ បទជាប្រពៃណីខ្មែររបស់យើង និងទី២ បទបែបប្លែកអារម្មណ៍ឱ្យបងប្អូនអ៊ំពូមីង រាំលេងសប្បាយ សម្រាប់ពិធីបុណ្យភ្ជុំបិណ្ឌឆ្នាំនេះ។
លោកឧកញ៉ា ខេមរៈ សិរីមន្ត បានបន្ថែមថា៖ “ក្នុងឱកាសពិធីបុណ្យភ្ជុំបិណ្ឌឆ្នាំនេះ ខ្ញុំមានបទចម្រៀងច្រើនបទ ទាំងពីរទម្រង់ដូចបានបញ្ជាក់ខាងលើ ទាំងបទបែបដឹងគុណឪពុកម្តាយ ក៏ដូចជាមានបទមួយយើងបានបញ្ចូលធម៌ទៀត គឺបទ «១០ឆ្នាំមានប៉ុន្មានដង» ទើបចេញបានបីបួនថ្ងៃមុននេះ ហើយមានសារអបរំច្រើនក្នុងបទចម្រៀងមួយបទនេះ។ ខ្ញុំក៏មានបទទម្រង់មួយប្រភេទទៀត សម្រាប់ការរាំលេងកម្សាន្ត លក្ខណៈថាពេលសម្រាកពីការងារក្នុងពិធីបុណ្យភ្ជុំបិណ្ឌ យើងអាចរាំលេងកម្សាន្តជួបជុំគ្រួសារផងដែរ”។
សូមជម្រាបថា បុណ្យភ្ជុំបិណ្ឌប្រពៃណីជាតិខ្មែរឆ្នាំ២០២៣នេះ នឹងចាប់ផ្តើមពីថ្ងៃទី៣០ ខែកញ្ញា រហូតដល់ថ្ងៃទី១៥ ខែតុលា ហើយក្នុងនោះពិធីបុណ្យភ្ជុំធំមានរយៈពេល ៣ថ្ងៃ គឺនៅថ្ងៃទី១៣ ដល់ថ្ងៃទី១៥ ខែតុលា ខាងមុខនេះ៕
