សម្តេច ហ៊ុន ម៉ាណែត៖ ប្រាក់ជំនួយរបស់អាមេរិក ចំនួន ១៨ លានដុល្លារ នឹងប្រើប្រាស់លើវិស័យចំនួន៤

សម្តេច ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានឱ្យដឹងថា ជំនួយថវិកា ដែលកម្ពុជាទទួលបានពីប្រទេសអាមេរិក ចំនួន ១៨ លានដុល្លារ នឹងត្រូវប្រើប្រាស់លើវិស័យធំៗចំនួន៤។ការបញ្ជាក់នេះ ត្រូវបានធ្វើឡើងតាមរយៈខ្លឹមសារនៃជំនួបរវាងសម្តេច ជាមួយផាទ្រីក មើហ្វី (W. Patrick Murphy) ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា នៅថ្ងៃទី២៧ ខែកញ្ញា ឆ្នាំ២០២៣។

ខែកញ្ញា ឆ្នាំ២០២៣ នៅវិមានសន្តិភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម ផាទ្រីក មើហ្វី (W. Patrick Murphy) ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា ។

នាឱកាសនោះ សម្តេច ហ៊ុន ម៉ាណែត បានលើកឡើងថា ក្នុងនាមរាជរដ្ឋាភិបាលកម្ពុជា សូមថ្លែងអំណរគុណចំពោះរដ្ឋាភិបាលអាមេរិក ដែលបានផ្តល់ជូនឡើងវិញនូវជំនួយក្នុងទំហំទឹកប្រាក់ប្រមាណ ១៨ លានដុល្លារអាមេរិក តាមរយៈទីភ្នាក់ងារអាមេរិកសម្រាប់ការអភិវឌ្ឍអន្តរជាតិ (US AID)។

 សម្តេចបានបន្តថា៖«ប្រាក់ជំនួយដែលត្រូវបានផ្តល់ជូនឡើងវិញនេះ នឹងត្រូវយកទៅប្រើប្រាស់នៅក្នុងវិស័យសំខាន់ៗ ដូចជា៖១.ការកែលម្អការផ្ដល់សេវាសុខាភិបាលទាំងក្នុងផ្នែករដ្ឋ និងផ្នែកឯកជន២.ការពារបរិស្ថានប្រកបដោយចិរភាព ៣.ការការពារ និងការប្រយុទ្ធនឹងជំងឺរបេង និង៤. ការបណ្ដុះបណ្ដាលផ្នែកសហគ្រិនភាពដល់យុវជនកម្ពុជាជាដើម»។

គួរបញ្ជាក់ដែរថា តាមរយៈជំនួបខាងលើនេះ កម្ពុជា-អាមេរិក ក៏បានឯកភាពគ្នាក្នុងការបន្តសម្របសម្រួល និងសហប្រតិបត្តិការយ៉ាងជិតស្និទ្ធនៅគ្រប់ជំហាននៃនីតិវិធី ក្នុងនោះមាន៖១.ពន្លឿននីតិវិធីក្នុងការកំណត់អត្តសញ្ញាណ និងការរៀបចំបញ្ជូនពលរដ្ឋខ្មែរ មកកម្ពុជា ២.ធ្វើសាមញ្ញកម្មនីតិវិធី នៅពេលបញ្ជូន និង ៣. រៀបចំផែនការសកម្មភាពនៃការគាំទ្រ និងការធ្វីសមាហរណកម្ម សម្រាប់ឱ្យពលរដ្ឋខ្មែរ អាចបន្ស៊ាំ និងអាចធ្វីសមាហរណកម្មទៅក្នុងសង្គមកម្ពុជាវិញ សំដៅកសាងជីវិតថ្មីមួយឱ្យបានល្អនៅលើទឹកដីកម្ពុជា។

តាមរយៈជំនួបនេះដែរ ភាគីទាំងពីរ ក៏បានប្តេជ្ញាចិត្តផងដែរថា នឹងបន្តនូវកិច្ចសហប្រតិបត្តិជាមួយគ្នា ឱ្យកាន់តែជិតស្និទ្ធបន្ថែមទៀត សម្រាប់ជាឧត្តមប្រយោជន៍នៃប្រទេសទាំងពីរថែមទៀត៕

អត្ថបទ៖ ពិសី