អត្ថន័យនៃនិមិត្តសញ្ញាសមាគមឧកញ៉ាកម្ពុជា ត្រូវបានទទួលស្គាល់ជាផ្លូវការ តាមរយៈព្រះរាជក្រឹត្យលេខ នស/រកត/១០២៣/២២៥០ ចុះថ្ងៃទី១១ ខែតុលា ឆ្នាំ២០២៣ ស្តីពីគោរមងារឧកញ៉ា។
ដូចដែលមានចែងក្នុងមាត្រា២០ នៃជំពូកទី៧ និងមានភ្ជាប់ក្នុងឧបសម្ព័ន្ធទី១៦ នៃព្រះរាជក្រឹត្យនេះ រូបសញ្ញានៃសមាគមឧកញ៉ាកម្ពុជា មានលក្ខណៈសម្គាល់ និងអត្ថន័យដូចខាងក្រោម៖
១. រូបក្បាលហង្សពណ៌មាសរាងក្បាលស្រៈ (ឧ) ពេញតួ៖ តំណាងឱ្យសភាវៈល្អថ្លៃថ្លា ភាពអង់អាចមោះមុត និងមេត្តាធម៌។
២. ក្បាច់ភ្ញីទេសពណ៌មាសពត់ពេនជារាងស្រៈ (ឧ)ពេញតួ៖ តំណាងឱ្យវប្បធម៌ខ្មែរ និងភាពខ្ពង់ខ្ពស់ អង់អាច។
៣. ក្បាច់ភ្ញីទេសពណ៌មាសដែលមានរូបរាងដូចស្លឹកពោធិ៍ព័ទ្ធពីក្រៅជុំវិញស្រៈ (ឧ)ពេញតួ៖ តំណាងឱ្យការប្រាស្រ័យទាក់ទង និងកិច្ចសហការក្នុងគ្រួសារឧកញ៉ាកម្ពុជា ជួយដល់ប្រជាជនក្រីក្រ និងលើកកម្ពស់ឧត្តមភាពនៃគោរមងារឧកញ៉ានៅកម្ពុជា។
៤. ក្បាច់ត្របកឈូកធំពណ៌មាសដែលនៅចំកណ្តាលពីខាងក្រោមនៃស្រៈ (ឧ)ពេញតួ និងក្បាច់ត្របកឈូកតូចៗពណ៌មាសជាច្រើនព័ទ្ធជុំវិញតាមរាងស្លឹកពោធិ៍៖ តំណាងឱ្យភាពរុងរឿង និងភាពសុខដុមរមនានៃគ្រួសារឧកញ៉ាកម្ពុជា។
៥. ខ្សែបូរពណ៌មាសទ្រពីក្រោមរូបស្លឹកពោធិ៍មានចារឹកអក្សខ្មែរពណ៌មាស សមាគមឧកញ៉ាកម្ពុជា៖ តំណាងឱ្យកិច្ចសហប្រតិបត្តិការពាណិជ្ជកម្ម និងការវិនិយោគយ៉ាងទូលំទូលាយពីសមាគមឧកញ៉ាកម្ពុជា ក្នុងកម្រិតជាតិ និងអន្តរជាតិ។
៦. ក្បាច់ភ្ញីទេសពណ៌មាសទ្រពីក្រោមខ្សែបូរ៖ តំណាងឱ្យសំឡេងរួម សកម្មភាពសប្បុរសធម៌ រួមនឹងការជួយលើកតម្កើងគុណតម្លៃដ៏ឧត្តុង្គឧត្តមនៃគោរមងារឧកញ៉ានៅកម្ពុជា។
សូមបញ្ជាក់ថា រូបសញ្ញា «សមាគមឧកញ៉ាកម្ពុជា» ខាងលើនេះ នឹងត្រូវប្រើប្រាស់សម្រាប់ជាកន្លាស់អាវ ក៏ដូចជាសញ្ញាសម្គាល់លើ កអាវនៅលើឯកសណ្ឋានផ្លូវការ នៃគោរមងារ លោកអ្នកឧកញ៉ា អ្នកឧកញ៉ា និងឧកញ៉ា ផងដែរ។ សមាគមឧកញ៉ាកម្ពុជា គឺជាស្ថាប័នស្របច្បាប់តែមួយគត់ ដែលតំណាងឱ្យគោរមវន្តមានគោរមងារឧកញ៉ា និងមានសិទ្ធិពេញលេញលើការធ្វើបច្ចុប្បន្នកម្មលើបញ្ជីឈ្មោះ ក៏ដូចជាការរៀបចំចាត់ចែងឯកសណ្ឋានផ្លូវការ សម្រាប់គោរមវន្តទាំងអស់ នៅក្នុងព្រះរាជាណាចក្រកម្ពុជា៕
