រាជរដ្ឋាភិបាលកម្ពុជា បានចេញសេចក្តីសម្រេចស្តីពីការទទួលស្គាល់ជាផ្លូវការនូវសមាសភាពក្រុមការងារទាំង១៤ ផ្នែកឯកជននៃវេទិការាជរដ្ឋាភិបាល-ផ្នែកឯកជន ដែលចុះហត្ថលេខាដោយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី១២ ខែតុលា ឆ្នាំ២០២៣។
តាមរយៈសេចក្តីសម្រេចនេះ ក្រុមការងារ “ឈ” “ផ្នែកស្រូវ-អង្ករ” នៃវេទិការាជរដ្ឋាភិបាល-ផ្នែកឯកជន គឺមានសមាសភាពចំនួន ៣៩រូប ដោយក្នុងនោះមាន អ្នកឧកញ៉ា និងឧកញ៉ា ចំនួន ១០រូប រួមមានដូចជា៖ ឧកញ៉ា ចាន់ សុឃាំង សហប្រធាន, អ្នកឧកញ៉ា ហ៊ុន ឡាក់ អ្នកឧកញ៉ា ភួ វាសនា ឧកញ៉ា សុង សារ៉ន ឧកញ៉ា គឹម សាវុធ (អនុប្រធាន) ឧកញ៉ា យិន វែងអាន ឧកញ៉ា គឹម ប៊ុនសាន្ត ឧកញ៉ា ស៊ិន ចន្ធី ឧកញ៉ា ម៉ែន សុភក្តិ និងឧកញ៉ា ហង្ស សុគន្ធ ជាសមាជិក។ ក្រៅពីនេះ មានលោក-លោកស្រី ព្រមទាំងតំណាងសហព័ន្ធស្រូវអង្ករកម្ពុជា តំណាងសមាគមភស្តុភារកម្មកម្ពុជា តំណាងសមាគមដឹកជញ្ជូន និងតំណាងសមាគមធនាគារនៅកម្ពុជា។
ក្រុមការងារ “ឈ” “ផ្នែកស្រូវ-អង្ករ” នៃវេទិការាជរដ្ឋាភិបាល-ផ្នែកឯកជន ដែលមានលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងឧកញ៉ា ចាន់ សុឃាំង ជាសហប្រធាន បានរៀបចំកិច្ចប្រជុំ កាលពីរសៀលថ្ងៃទី១៩ ខែតុលា ឆ្នាំ២០២៣ ដើម្បីពិគ្រោះ ពិភាក្សា និងដោះស្រាយទៅលើបញ្ហាប្រឈមដែលពាក់ព័ន្ធនឹងវិស័យស្រូវ-អង្ករនៅក្នុងប្រទេសកម្ពុជា។
បញ្ហាប្រឈមពាក់ព័ន្ធនឹងវិស័យស្រូវ-អង្ករ ដែលលើកឡើងក្នុងកិច្ចប្រជុំ មានដូចជា៖ ១.គ្រាប់ពូជ seeds), ២.ពូជស្រូវអាទិភាព, ៣.ធាតុចូលកសិកម្ម (ជីកសិកម្ម), ៤.ធាតុចូលកសិកម្ម (ថ្នាំពលកសិកម្ម), ៥.ការគ្រប់គ្រងរបស់សហគមន៍កសិកម្ម, ៦.ឥណទានសហគមន៍កសិកម្ម, ៧.ការផ្គត់ផ្គង់ថាមពល ជាដើម។
សូមជម្រាបថា បញ្ហាទាំងអស់ខាងលើនេះ ត្រូវបានអង្គប្រជុំពិភាក្សា និងសម្រេចបានមួយចំនួន រីឯមួយចំនួនទៀតត្រូវបានរក្សាទុក ដើម្បីធ្វើរបាយការណ៍រួមរវាងវិស័យឯកជន និងរដ្ឋាភិបាល (ក្រសួងកសិកម្ម រុក្ខាប្រមាញ់ និងនេសាទ) ដើម្បីនឹងត្រៀមសម្រាប់វេទិការាជរដ្ឋាភិបាល-ផ្នែកឯកជន លើកទី១៩ ក្រោមអធិបភាពសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងវិច្ឆិកា នាពេលឆាប់ៗខាងមុខនេះ៕
