ឧកញ៉ា ណាង ណាន អតីតកូនកំព្រាឪពុករស់នៅតាមវត្តអារ៉ាម និងបច្ចុប្បន្នជាអគ្គនាយកក្រុមហ៊ុនទេសចរណ៍ ណានពីរ បានរៀបចំព្រឹត្តិការណ៍ដ៏អស្ចារ្យការប្រកួតបាល់ទាត់មិត្តភាពរវាងស្ថានទូតកម្ពុជាប្រចាំប្រទេសថៃ ជាមួយក្រុមយុវជនពលករខ្មែរនៅប្រទេសថៃ ក្រោមអធិបតីដ៏ខ្ពង់ខ្ពស់ឯកឧត្តម ហ៊ុន សារឿន អគ្គរាជទូតកម្ពុជាប្រចាំប្រទេសថៃ កាលពីថ្ងៃទី៥ ខែវិច្ឆិកា ឆ្នាំ២០២៣។
លោកឧកញ៉ា ណាង ណាន បានឱ្យដឹងថា ការប្រកួតបាល់ទាត់លក្ខណៈមិត្តភាពនេះ ឧបត្ថម្ភធំដោយ ឯកឧត្តម ឧត្តមសេនីយ៍ទោ ភឺន ផល្លា មេបញ្ជាការរង កងពលតូចលេខ៧០ និងសហការឧបត្ថម្ភដោយលោកឧកញ៉ាផ្ទាល់ ដែលមានការចូលរួមពីរបងប្អូនពលករ យ៉ាងច្រើនកុះករ ប្រមានជិត ៣០០នាក់ និងក្រុមកីឡាករទាំងបួនក្រុម៖ QA CARGO, ស្ថានទូតកម្ពុជាប្រចាំប្រទេសថៃ, យុវជនសន្តិភាពឆ្លងដែន និងអាសាហ៊ី។ បន្ថែមពីនេះ ក្រោយពីចប់ការប្រកួត ក៏មានកម្មវិធីពិសារនំបញ្ចុកសាមគ្គីរួមគ្នាផងដែរ។
ឯកឧត្តម ហ៊ុន សារឿន អគ្គរាជទូតកម្ពុជាប្រថៃប្រទេសថៃ បានសម្តែងសេចក្តីសោមនស្សរីករាយ និងបានថ្លែងអំណរគុណថា៖ “អរគុណលោកឧកញ៉ា ណាង ណាន សម្រាប់ការរៀបចំព្រឹត្តិការណ៍នេះ និងអញ្ជើញខ្ញុំជាអធិបតីបើកកម្មវិធីប្រកួត និងប្រគល់ពានរង្វាន់ដល់ក្រុមដែលទទួលជ័យលាភី”។
ឧកញ៉ា ណាង ណាន បានបង្ហាញសារថ្លែងអំណរគុណផងដែរថា៖ “ខ្ញុំបាទ ឧកញ៉ា ណាង ណាន ប្រធានគណបក្សប្រជាជនកម្ពុជា សាខាទី ១៧ ប្រចាំប្រទេសថៃ សូមគោរពថ្លែងអំណរអរគុណដល់ ឯកឧត្តម ហ៊ុន សារឿន អគ្គរាជទូតកម្ពុជាប្រចាំប្រទេសថៃ ហើយក៏ជាប្ររធានគណបក្សប្រជាជនកម្ពុជា ប្រចាំប្រទេសថៃ ដែលបានអញ្ចើញចូលរួម ជាអធិបតី ក្នុងការប្រកួតបាល់ទាត់មិត្តភាព រវាងពលករ កម្មករ កម្ពុជាដែលរស់នៅក្នុងប្រទេសថៃ។ ខ្ញុំបាទឧកញ៉ា ណាង ណានសូមគោរពជូនពរ ដល់ឯកឧត្តម ហ៊ុន សារឿន និង ពលករទាំងអស់អោយជួបតែ ពុទ្ធពរ ទាំងបួនប្រការ អាយុ វណ្ណះ សុខះ ពលះ កុំបីឃ្លាង ឃ្លាតឡើយ”។
ឧកញ៉ា ណាង ណាន អតីតជាក្មេងលក់លតឆា និងលក់កាសែតនៅផ្សារកណ្ដាល ក្នុងរាជធានីភ្នំពេញ ត្រូវបាន ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ប្រោសព្រះរាជទាន គោរមងារជា «ឧកញ៉ា» កាលពីថ្ងៃទី៥ ខែមិថុនា ឆ្នាំ២០២៣ ដោយព្រះរាជក្រឹត្យលេខ នស/រកត/០៦២៣/១០៦៣៕
