ក្រុមហ៊ុនផលិតរថយន្តលំដាប់ពិភពលោក Tesla Inc មានបំណងបង្កើនការនាំចូលគ្រឿងបង្គុំរថយន្ត ពីប្រទេសឥណ្ឌាទ្វេដង។ នេះបើតាមការបង្ហោះសារ របស់រដ្ឋមន្ត្រីក្រសួងពាណិជ្ជកម្ម លោក Piyush Goyal នៅលើបណ្ដាញសង្គម X។
លោក Goyal បានសរសេរលើបណ្ដាញសង្គមថា៖ ខ្ញុំពិតជាមានមោទនភាពណាស់ ចំពោះការរីកដុះដាលនៃការផ្គត់ផ្គង់សម្ភារៈរថយន្តរបស់ឥណ្ឌា ទៅកាន់ក្រុមហ៊ុន Tesla ខណៈបច្ចុប្បន្នពួកគេកំពុងចង់បង្កើនការនាំចូលគ្រឿងបង្គុំរថយន្តទ្វេដង ពីប្រទេសឥណ្ឌា។
គួររំលឹកបន្តិចថា កាលពីខែកញ្ញា រដ្ឋមន្ត្រីក្រសួងពាណិជ្ជកម្មឥណ្ឌា ធ្លាប់បានលើកឡើងថា Tesla មានគម្រោងចាយលុយចន្លោះពី ១,៧ ទៅ ១,៩ពាន់លានដុល្លារ ទៅលើការនាំចូលគ្រឿងបង្គុំពីប្រទេសឥណ្ឌានាឆ្នាំនេះ ខណៈកាលពីឆ្នាំទៅ ពួកគេចាយត្រឹមតែ ១ពាន់លានដុល្លារប៉ុណ្ណោះ។
សូមជម្រាបបន្ថែមថា កាលពីសប្ដាហ៍មុន សារព័ត៌មាន Reuters ធ្លាប់បានចុះផ្សាយថា លោក Goyal បានបំពេញទស្សនកិច្ចទៅអាមេរិក ក្នុងគោលបំណងពិភាក្សាជាមួយមហាសេដ្ឋី Elon Musk ជុំវិញផែនការបង្កើតរោងចក្រនៅប្រទេសឥណ្ឌា ដែលអាចផលិតរថយន្តក្នុងតម្លៃ ២៤ ០០០ដុល្លារបាន ប៉ុន្តែគួរឲ្យសោកស្ដាយ រដ្ឋមន្ត្រីពាណិជ្ជកម្មឥណ្ឌារូបនេះ មិនបានជួបសំណេះសំណាលជាមួយមេធំក្រុមហ៊ុន Tesla នោះឡើយ៕
