សវនាការជំនុំជម្រះក្ដីរបស់ក្រុមហ៊ុន China Evergrande Group ជុំវិញការបញ្ជាឲ្យរំលាយក្រុមហ៊ុន ដើម្បីយកប្រាក់ទៅសងបំណុល ត្រូវបានពន្យារពេលទៅខែក្រោយវិញ ដោយតុលាការសម្រេចទុកពេលឲ្យក្រុមហ៊ុនជាប់បំណុលច្រើនបំផុតលើលោកមួយនេះ អាចរៀបចំរចនាសម្ព័ន្ធបំណុលរបស់ខ្លួន ឲ្យបានរួចរាល់។
យោងតាមការចុះផ្សាយពីសារព័ត៌មាន Reuters បានរាយការណ៍ថា តុលាការបានពន្យារពេលការបើកសវនាការមួយនេះ រហូតដល់ថ្ងៃទី២៩ ខែមករា បន្ទាប់ពីក្រុមមេធាវីស្នើសុំឲ្យមានការពន្យារពេល ក្រោមហេតុផលថា ម្ចាស់បំណុលទាំងអស់សុទ្ធតែមិនចង់ឃើញ Evergrande រំលាយក្រុមហ៊ុនឡើយ។
ជាមួយគ្នា តុលាការកំពូលហុងកុង ក៏បានសង្កត់ធ្ងន់ថា ការពន្យារពេលសារនេះគឺជាការផ្ដល់ឱកាសចុងក្រោយ សម្រាប់ក្រុមហ៊ុន Evergrande ដើម្បីរកវិធីសាស្ត្រក្នុងការជួយខ្លួនឯង ពីការរំលាយក្រុមហ៊ុន។
គួររំលឹកបន្តិចថា ក្រុមហ៊ុន Evergrande មានបំណុលច្រើនជាង ៣០០ពាន់លានដុល្លារ ខណៈកាលពីសប្ដាហ៍មុន ពួកគេបានជួបជាមួយម្ចាស់បំណុល ជជែកគ្នាពីរចនាសម្ព័ន្ធបំណុលថ្មី ប៉ុន្តែក្រុមម្ចាស់បំណុលបដិសេធផែនការរបស់ Evergrande និងទាមទារឲ្យមានការរំលាយក្រុមហ៊ុន បើសិនជាក្រុមហ៊ុនចិនមួយនេះ មិនព្រមកែសម្រួលរចនាសម្ព័ន្ធបំណុល តាមដែលអ្វីដែលពួកគេចង់បាន។
ជម្រាបបន្ថែមថា បើសិនជា Evergrande ត្រូវបានរំលាយក្រុមហ៊ុនមែន នោះក្រុមម្ចាស់បំណុលនឹងទទួលបានទឹកប្រាក់ប្រហែល ២៤០ពាន់លានដុល្លារ ប៉ុន្តែវិស័យអចលនទ្រព្យនៅប្រទេសចិន នឹងកាន់តែប្រឈមហានិភ័យធ្ងន់ធ្ងរមួយកម្រិតទៀត៕
