យោងតាមទីភ្នាក់ងារជំរុញការវិនិយោគរបស់រដ្ឋាភិបាល បានប្រកាសនៅថ្ងៃពុធនេះថា ប្រទេសម៉ាឡេស៊ី បានធ្វើការអនុម័តទៅលើគម្រោងនៃការវិនិយោគបានចំនួន ២២៥ពាន់លានរីងហ្គីត (៤៨,១៨ពាន់លានដុល្លារ) ក្នុងរយ:ពេល ៩ខែដំបូងឆ្នាំនេះ។ នេះបើតាមការចុះផ្សាយពីសារព័ត៌មាន CNA។
រដ្ឋមន្ត្រីក្រសួងវិនិយោគ ពាណិជ្ជកម្ម និងឧស្សាហកម្ម លោក Tengku Zafrul Aziz មានប្រសាសន៍ថា ជុំវិញគម្រោងវិនិយោគដែលរដ្ឋាភិបាលបានអនុម័តនេះ ភាគច្រើនកើតឡើងនៅក្នុងវិស័យសេវាកម្ម ផលិតកម្ម និងវិស័យចម្បងផ្សេងទៀត គិតចាប់ពីខែមករាដល់ខែកញ្ញាឆ្នាំនេះ។
លោក Tengku Zafrul បាននិយាយនៅក្នុងសន្និសីទសារព័ត៌មានមួយនៅថ្ងៃនេះថា ៖ “ការវិនិយោគនេះត្រូវបានគេរំពឹងថានឹងបង្កើតឱកាសការងារចំនួន ៨៩ ៤៩៥ កន្លែងឯណោះ ដែលនេះបានបង្ហាញពីភាពធន់របស់ម៉ាឡេស៊ី ចំពេលមានភាពមិនច្បាស់លាស់ជាសកល នៅក្នុងឧស្សាហកម្មចម្រុះ” ។
រដ្ឋមន្ត្រីរូបនេះ បានបន្ថែមឲ្យដឹងទៀតថា ការវិនិយោគផ្ទាល់ពីបរទេស (FDI) បង្កើតបានដល់ទៅ ៥៥,៩% ឯណោះ នៃការវិនិយោគសរុបដែលត្រូវបានអនុម័ត ខណ:ពេលដែលប្រទេសហូឡង់ បានក្លាយជាប្រភពនាំមុខគេនៃការវិនិយោគផ្ទាល់ពីបរទេសសម្រាប់ម៉ាឡេស៊ី ។
ទន្ទឹមនឹងនេះ លោក Tengku Zafrul បាននិយាយថា ការវិនិយោគផ្ទាល់ក្នុងស្រុក បានរួមចំណែកចំនួន ៩៩,៣ពាន់លានរីងហ្គីត ឬ ៤៤,១% នៃការវិនិយោគសរុបដែលត្រូវបានអនុម័ត៕
