ឧកញ៉ាបណ្ឌិត គីម ហ៊ាង ប្រធានស្ថាបនិក KW Cambodia និងជាអគ្គនាយក បុរី វិមានសំណាង យល់ឃើញថា នៅពេលយើងបានឆ្លងកាត់វិបត្តិសេដ្ឋកិច្ចសកលរយៈពេល៤ឆ្នាំ តាំងពីផ្ទុះជំងឺកូវីដ-១៩ ចាប់ពីឆ្នាំ២០២០ រួមជាមួយបញ្ហាសង្គ្រាមរុស្ស៊ី-អ៊ុយក្រែន និងសង្គ្រាមរវាងអ៊ីស្រាអែល-ក្រុមហាម៉ាស រហូតមកដល់ចុងឆ្នាំ២០២៣នេះ បានបង្រៀនយើងឱ្យចេះអត់ធ្មត់ និងឱ្យចេះគ្រប់គ្រងហិរញ្ញវត្ថុ ឬការប្រើប្រាស់លុយឱ្យបានត្រឹមត្រូវ។
លោកឧកញ៉ាបណ្ឌិត បានលើកឡើងក្នុងឱកាសដែលលោកអញ្ជើញជាអធិបតីក្នុងពិធីចុះហត្ថលេខាលើកិច្ចព្រមព្រៀងបើកសាខា KW ខេត្តកំពត (KW Kampot) កាលពីថ្ងៃសៅរ៍ ទី៩ ខែធ្នូ ឆ្នាំ២០២៣ ថាមេរៀនដែលយើងបានឆ្លងកាត់ ហើយយើងកំពុងតែឆ្លងកាត់ ទាក់ទងនឹងវិបត្តិសេដ្ឋកិច្ចសកល សង្គ្រាមសកល តាំងពីឆ្នាំ២០២០ ដល់ចុងឆ្នាំ២០២៣ បានបង្រៀនមនុស្សយើងនូវរឿង២យ៉ាងគឺ ទី១)ត្រូវមានភាពអត់ធ្មត់ ព្រោះមានតែការអត់ធ្មត់ទេ ទើបអាចឱ្យយើងឆ្លងកាត់រឿងលំបាកជាច្រើន និង ទី២)ធ្វើឱ្យយើងចេះគ្រប់គ្រងហិរញ្ញវត្ថុ ឬការប្រើប្រាស់លុយ»។
លោកឧកញ៉ា បានបញ្ជាក់បន្ថែមថា៖ «យើងបានឆ្លងកាត់ដំណាក់កាលទី១ គឺពិបាករកលុយ ទី២ គឺពិបាកក្នុងការប្រើប្រាស់លុយ ឬគ្រប់គ្រងលុយ។ ខ្ញុំមើលឃើញ អ្នករកស៊ីភាគច្រើន ដែលបរាជ័យ ព្រោះគាត់ប្រើប្រាស់លុយមិនចំគោលដៅ។ គ្រប់បណ្ដាក្រុមហ៊ុន ឬអាជីវកម្មធំៗ មិនថា ក្រុមហ៊ុនអចលនទ្រព្យ ឬក្រុមអភិវឌ្ឍន៍លំនៅឋានទេ អ្នកដែលនៅឈររឹងមាំបាន គឺជាអ្នកដែលពូកែរកលុយផង ហើយពូកែគ្រប់គ្រង និងប្រើប្រាស់លុយឱ្យចំគោលដៅផង។ ដូច្នេះ ៤ឆ្នាំនេះ បានបង្រៀនឱ្យយើងចេះអត់ធ្មត់ និងចេះគ្រប់គ្រងហិរញ្ញវត្ថុបានត្រឹមត្រូវ»។
ឧកញ៉ាបណ្ឌិត គីម ហ៊ាង មើលឃើញសេដ្ឋកិច្ចជាតិ ពិសេសអាជីវកម្មលើវិស័យអចលនទ្រព្យ ហាក់មានភាពកម្រើកឡើងវិញ នៅចុងឆ្នាំនេះ ហើយលោកសង្ឃឹមថានឹងមានការវិវឌ្ឍន៍កាន់តែប្រសើរ នាឆ្នាំ២០២៤-២០២៥ ខាងមុខ។ ជាមួយគ្នានេះលោកឧកញ៉ា ក៏ធ្លាប់បានសំណូមពរឱ្យផ្សព្វផ្សាយចំណុចវិជ្ជមានពីកម្ពុជាឱ្យបានច្រើន មិនថាពាក់ព័ន្ធវិស័យអចលនទ្រព្យ ឬវិស័យអ្វីនោះទេ ត្រូវតែបង្កប់នូវគំនិតវិជ្ជមានជានិច្ច ព្រោះមានតែបុគ្គលវិជ្ជមានប៉ុណ្ណោះ ដែលនិយាយរឿងវិជ្ជមាន ហើយទទួលបានលទ្ធផលវិជ្ជមានទាំងខ្លួនឯង និងប្រទេសជាតិ៕
