យោងតាមទិន្នន័យបឋមរបស់រដ្ឋាភិបាលឥណ្ឌា បានបង្ហាញឲ្យដឹងថា តម្លៃជាមធ្យមនៃប្រេងរបស់រុស្ស៊ី ដែលបានលក់មកកាន់ប្រទេសឥណ្ឌា ក្នុងខែតុលា បានកើនឡើងដល់ ៨៤,២០ដុល្លារក្នុងមួយបារ៉ែល ពោលគឺលើសពីតម្លៃ ៦០ដុល្លារ ក្នុងមួយបារ៉ែល ដែលត្រូវបានបានកំណត់ដោយក្រុមប្រទេស G7 កាលពីក្នុងខែធ្នូឆ្នាំមុន។ នេះបើតាមការចុះផ្សាយពីសារព័ត៌មាន CNA។
ឥណ្ឌា បានចំណាយប្រាក់ខ្ពស់បំផុតសម្រាប់ការទិញយកប្រេងរបស់រុស្ស៊ី នៅក្នុងខែតុលា បើទោះបីជាមានការខិតខំប្រឹងប្រែងយ៉ាងខ្លាំងពីសំណាក់ប្រទេសលោកខាងលិច ដើម្បីទប់ស្កាត់ការរកប្រាក់ចំណូល និងការផ្តល់មូលនិធិជូនដល់រដ្ឋាភិបាលទីក្រុងម៉ូស្គូ ជុំវិញការបង្កសង្គ្រាមនៅក្នុងប្រទេសអ៊ុយក្រែនក៏ដោយ។
ទោះបីជាដឹងថានេះជាសកម្មភាពប្រឆាំងទៅនឹងការដាក់ទណ្ឌកម្មទៅលើរដ្ឋាភិបាលទីក្រុងម៉ូស្គូក៏ដោយ ប៉ុន្តែតម្លៃជាមធ្យមនៃប្រេងរបស់រុស្ស៊ីគឺទាបជាង តម្លៃប្រេងរបស់ប្រទេសអ៊ីរ៉ាក់ និងអារ៉ាប៊ីសាអូឌីត ដែលជាអ្នកផ្គត់ផ្គង់ប្រេងធំបំផុតលំដាប់ទីពីរ និងទីបីរបស់ឥណ្ឌា។
បើតាមទិន្នន័យរបស់ក្រសួងពាណិជ្ជកម្មឥណ្ឌា បានបង្ហាញថា តម្លៃប្រេងមួយធុងពីអ៊ីរ៉ាក់ ជាមធ្យមមានតម្លៃ ៨៥,៩៧ដុល្លារ និងអារ៉ាប៊ីសាអូឌីត មានតម្លៃ ៩៨,៧៧ដុល្លារ គិតនៅក្នុងខែតុលា។
ក្រៅពីការផ្គត់ផ្គង់ផ្ទាល់ពីប្រទេសរុស្ស៊ី ក្រុមហ៊ុនចម្រាញ់ប្រេងរបស់ឥណ្ឌា ក៏ទទួលបានប្រេងរបស់រុស្ស៊ី ដែលផ្គត់ផ្គង់ពីកំពង់ផែក្នុងប្រទេសក្រិក អេស្ប៉ាញ និងកូរ៉េផងដែរ៕
