យោងតាមទិន្នន័យផ្លូវការមួយ បានបង្ហាញនៅថ្ងៃសុក្រ ទី១៥ ខែធ្នូមិ្សលមិញថា តម្លៃផ្ទះថ្មីៗនៅក្នុងប្រទេសចិន បានបន្តធ្លាក់ចុះក្នុងរយ:ពេល ៥ខែជាប់ៗគ្នា គិតត្រឹមខែវិច្ឆកា ខណ:វិស័យអចលនទ្រព្យនៅក្នុងប្រទេសនេះ នៅតែបន្តប្រឈមមុខជាមួយនឹងវិបត្តិ ដោយសារតែភាពទន់ខ្សោយនៃតម្រូវការ និងការវិនិយោគ។
តាមការចុះផ្សាយពីសារព័ត៌មាន Reuters ដោយផ្អែកលើទិន្នន័យរបស់ការិយាល័យស្ថិតិជាតិចិន (NBS) បានបង្ហាញឲ្យដឹងថា តម្លៃផ្ទះថ្មីៗ បានធ្លាក់ចុះ ០,៣% នៅក្នុងខែវិច្ឆិកា ពោលគឺដូចទៅនឹងតួលេខនៃការធ្លាក់ចុះ កាលពីក្នុងខែតុលាកន្លងទៅផងដែរ។
ទីក្រុងលំដាប់ទី១ ទី២ និងទី៣ របស់ប្រទេសចិន សុទ្ធសឹងតែបានកត់ត្រាពីការធ្លាក់ចុះសម្រាប់តម្លៃផ្ទះថ្មីៗ នៅក្នុងខែវិច្ឆិកា ដោយក្នុងចំណោមទីក្រុងចំនួន ៧០ ដែលត្រូវបានអង្កេតដោយ NBS មាន ៥៩ ទីក្រុងហើយ ដែលបានរាយការណ៍ពីការធ្លាក់ចុះ។
គួរឲ្យដឹងផងដែរថា ប្រទេសចិនបាននិងកំពុងបង្កើនវិធានការដើម្បីទប់ស្កាត់ផលប៉ះពាល់នៃការធ្លាក់ចុះនៃវិស័យអចលនទ្រព្យរបស់ខ្លួន ដោយទាំងទីក្រុងប៉េកាំង និងទីក្រុងសៀងហៃ បានដាក់ចេញច្បាប់បន្ធូរបន្ថយការរឹតបន្តឹងទៅលើការទិញផ្ទះ ក្នុងកិច្ចខិតខំប្រឹងប្រែងរបស់អាជ្ញាធរចិន ក្នុងការធ្វើឱ្យទីផ្សារលំនៅដ្ឋានដែលធ្លាក់ចុះ ឲ្យងើបឡើងវិញសារជាថ្មី។
ទន្ទឹមនឹងនេះ ថ្នាក់ដឹកនាំរបស់ប្រទេសចិន ក៏បានធ្វើការសន្យា នៅក្នុងកិច្ចប្រជុំមួយនៅសប្តាហ៍នេះ ដើម្បីពន្លឿនការបង្កើតគំរូថ្មីនៃការអភិវឌ្ឍអចលនទ្រព្យ និងពន្លឿនការសាងសង់លំនៅដ្ឋានដែលមានតម្លៃសមរម្យ៕
