ឧកញ៉ាបណ្ឌិត សំ សុខនឿន ប្រធានសមាគមអចលនទ្រព្យសកល និងជាអគ្គនាយកក្រុមហ៊ុន SAM SN REALTY បានបង្ហើបប្រាប់ពីមូលហេតុពិត ដែលលោកកម្រនឹងបង្ហោះរូបភាពជាមួយអ្នកមានធំៗ ឬជាមួយអ្នកធំផ្សេងៗនៅលើបណ្តាញសង្គម។
លោកឧកញ៉ា បានលើកឡើងលើទំព័រហ្វេសប៊ុក នៅព្រឹកថ្ងៃពុធនេះថា មានមិត្តសួរលោកតាមត្រង់ដូច្នេះថា ហេតុដូចម្តេច ចូលចិត្តបង្ហោះរូបម្នាក់ៗឯង កម្របង្ហោះជាមួយអ្នកមានធំៗ ឬអ្នកធំផ្សេងៗ ដែលបានថតរូបជាមួយ?
ជាការឆ្លើយតប លោកឧកញ៉ា បានប្រាប់តាមត្រង់ទៅវិញថា លោកបង្ហោះរូបលើបណ្តាញសង្គមសាធារណៈ ដូច្នេះលោកមិនបង្ហោះរូបអ្នកផ្សេងជាសាធារណៈនោះទេ ព្រោះក្រែងប៉ះពាល់ឯកជនភាពរបស់គេ ឬចំណង់ចំណូលចិត្តដែលគេមិនចូលចិត្តបង្ហោះ ជាពិសេសមិនចង់ឱ្យគេទូទៅគិតថាលោកបង្ហោះជាមួយអ្នកមានធំៗ ឬអ្នកធំផ្សេងៗ ដើម្បីយកក្រេឌីតតាមគេ ឬ តោងក្រេឌីដគេនោះទេ។
លើសពីនេះ លោកឧកញ៉ាយល់ឃើញថា លោកពេញចិត្តនឹងអ្វីដែលខ្លួនឯងមាន ហើយលោកចង់ឱ្យគេឃើញអ្វីដែលជាលោកពិតប្រាកដ ជាពិសេសលោកចង់ប្រើប្រាស់ Brand របស់ខ្លួនឯង ឱ្យគេស្គាល់ជាលោកពិតប្រាកដ។ លោកឧកញ៉ា បានបន្ថែមថា តែយ៉ាងណាលោកក៏មានការបង្ហោះជាមួយគេខ្លះដែរ ដែលជាទូទៅជាមិត្តជិតស្និត បងៗជិតស្និតបំផុត ដោយមិនគិតថា ជាអ្នកមានធំៗ អ្នកមិនសូវសម្បូរទ្រព្យនោះទេ ហើយក៏មិនគិតថា អ្នកតូចៗអ្វីនោះដែរ។
ឧកញ៉ាបណ្ឌិត សំ សុខនឿន អគ្គនាយកក្រុមហ៊ុន SAM SN REALTY និងជាសមាជិកសមាគមឧកញ៉ាកម្ពុជា ជារឿយៗតែងមានភារកិច្ចចូលរួមអមដំណើរថ្នាក់ដឹកនាំរាជរដ្ឋាភិបាល ក្នុងដំណើរបេសកកម្មទៅក្រៅប្រទេស។ ជាក់ស្តែង លោកឧកញ៉ាក៏ទើបអញ្ជើញចូលរួមបេសកកម្ម និងកិច្ចប្រជុំពាណិជ្ជកម្មកម្ពុជា-ជប៉ុន នៅទីក្រុងតូត្យូ ប្រទេសជប៉ុន ក្រោមអធិបតីភាពដ៏ខ្ពង់ខ្ពស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីពេលថ្មីៗនេះផងដែរ៕
