នៅថ្ងៃទី២ ខែធ្នូ ទីភ្នាក់ងារសារព័ត៌មាន Anadolu បានរាយការណ៍មកថា នៅក្នុងឆ្នាំ២០២៣ ក្រុមហ៊ុន Tesla បានផលិតរថយន្តអគ្គិសនីសរុបចំនួន ១,៨៥លានគ្រឿង និងចែកចាយរថយន្តបានប្រមាណ ១,៨លានគ្រឿងផងដែរ។
ក្នុងនោះ ក្រុមហ៊ុនផលិតរថយន្តអគ្គិសនីរបស់អាមេរិកមួយនេះ បានផលិតរថយន្តជិត ៤៩៥ ០០០គ្រឿង និងបានចែកចាយច្រើនជាង ៤៨៤ ០០០គ្រឿងនៅក្នុងត្រីមាសទី៤ ឆ្នាំ២០២៣ នេះបើយោងតាមសេចក្តីថ្លែងការណ៍មួយដែលបានចេញផ្សាយកាលពីថ្ងៃអង្គារ។
ទន្ទឹមនឹងនោះ ក្នុងត្រីមាសទី៤ នៃឆ្នាំ២០២៣ ក្រុមហ៊ុន Tesla បានផលិតរថយន្តម៉ូឌែល 3 និង Y ចំនួន ៤៧៦ ៧៧៧គ្រឿង ហើយដោយសារតែរថយន្តទាំងពីរម៉ូឌែលនេះមានតម្លៃទាបសមរម្យ បានជំរុញឲ្យក្រុមហ៊ុនអាចចែកចាយរថយន្តបានចំនួន ៤៦១ ៥៣៥គ្រឿងនៅទូទាំងពិភពលោក កើនឡើង១៩% បើធៀបនឹងរយៈពេលដូចគ្នាកាលពីឆ្នាំ២០២២។
ចំណែកឯការដាក់លក់ម៉ូឌែលផ្សេងៗទៀតដូចជា ម៉ូឌែល S និង X ក៏ដូចជារថយន្តភីកអាប់ Cybertrucks ដែលទើបដាក់លក់ថ្មីថ្មោង បានកើនឡើង៣៤% ដល់ចំនួន ២២ ៩៦៩គ្រឿងផងដែរ៕
