ប្រធានាធិបតីបារាំង លោក Emmanuel Macron បានទទួលយកចំពោះការលាលែងចេញពីតំណែងជានាយករដ្ឋមន្ត្រីរបស់ លោកស្រី Elisabeth Borne កាលពីថ្ងៃចន្ទ ទី៨ ខែមករាកន្លងទៅ ចំពេលរដ្ឋាភិបាលទីក្រុងប៉ារីសកំពុងមានការរុះរើគណៈរដ្ឋមន្ត្រីទ្រង់ទ្រាយធំ។ នេះបើតាមការចុះផ្សាយពីសារព័ត៌មាន CGTN។
នៅលើប្រព័ន្ធផ្សព្វផ្សាយសង្គមផ្លូវការ លោក Macron បានបង្ហាញការកោតសរសើរជាពិសេសចំពោះការងាររបស់លោកស្រី Borne កន្លងមក និងថែមទាំងបានរៀបរាប់ទៀតថា លោកស្រីបានអនុវត្តគម្រោងជាច្រើននៅក្នុងជួររដ្ឋាភិបាល ជាមួយនឹងភាពក្លាហាន ការលះបង់ និងការប្តេជ្ញាចិត្ត ។
គួរឲ្យដឹងថា ការប្រកាសចំពោះការចាកចេញពីតំណែងនេះ ត្រូវបានធ្វើឡើងបន្ទាប់ពីមានកិច្ចប្រជុំរយៈពេលពីរម៉ោង រវាងថ្នាក់ដឹកនាំទាំងពីរ នៅក្នុងវិមានប្រធានាធិបតី Elysee ខណ:ប្រធានាធិតិបតី លោក Macron ត្រូវបានគេរំពឹងថានឹងតែងតាំងនាយករដ្ឋមន្ត្រីថ្មីដែលនឹងត្រូវចូលមកទទួលបន្ទុកជំនួស នៅក្នុងការបង្កើតរដ្ឋាភិបាលថ្មី នៅប៉ុន្មានថ្ងៃខាងមុខនេះ។
ជម្រាបជូនផងដែរថា លោកស្រី Borne ជាស្ត្រីទីពីរក្នុងប្រវត្តិសាស្ត្របារាំង ដែលត្រូវបានតែងតាំងជានាយករដ្ឋមន្ត្រី នៅក្នុងខែឧសភា ឆ្នាំ២០២២ ខណ:ពេលបច្ចុប្បន្ននេះ លោកស្រីនឹងនៅតែបន្តកាន់តំណែងនេះ រហូតដល់ពេលរដ្ឋាភិបាលរកអ្នកថ្មីមកជំនួសបាន៕
