ក្រុមហ៊ុន Apple បានដាក់នូវវិធានការថ្មី បន្ទាប់ពីអត្រាលក់ទូរស័ព្ទ iPhone នៅប្រទេសចិន មានការធ្លាក់ចុះយ៉ាងសំបើមនៅក្នុងសប្ដាហ៍ដំបូង នៃឆ្នាំ២០២៤ ខណៈវិធានការថ្មីនោះ គឺផ្ដល់ការបញ្ចុះតម្លៃមិនធ្លាប់មាន សម្រាប់ទូរស័ព្ទ iPhone 15 នៅប្រទេសចិន។
យោងតាមការចុះផ្សាយពីសារព័ត៌មាន Reuters បានបង្ហាញថា ក្រុមហ៊ុន Apple បានប្រកាសបញ្ចុះតម្លៃទូរស័ព្ទ iPhone 15 រហូតដល់ ៥% ប្រហែល ៥០០យ៉ន់ ឬ ៧០ដុល្លារក្នុងមួយគ្រឿង ពីថ្ងៃទី ១៨ ខែមករា រហូតដល់ថ្ងៃទី២១ ខែមករា។
ការបញ្ចុះតម្លៃមួយនេះ គឺកើតឡើងក្រោយអត្រាលក់របស់ក្រុមហ៊ុនខ្នាតយក្សអាមេរិក ធ្លាក់ចុះខ្លាំង ខណៈក្រុមហ៊ុនគូប្រជែងនៅប្រទេសចិនដូចជា Huawei និង Xiaomi មានកំណើនលក់ដ៏សំបើម។
ជម្រាបបន្ថែមថា អត្រាលក់ទូរស័ព្ទ iPhone 15 នៅប្រទេសចិន គឺមានកម្រិតទាបបំផុត ដែលក្រុមហ៊ុន Apple មិនធ្លាប់មាន ដូច្នេះហើយទើបក្រុមហ៊ុនខ្នាតយក្សអាមេរិកមួយនេះ កំពុងរកវិធីសាស្ត្របង្កើនកំណើនលក់ នៅក្នុងទីផ្សារដ៏ធំនៅលើពិភពលោកមួយនេះ៕
