រុស្ស៊ី បានវ៉ាដាច់ប្រទេសអារ៉ាប៊ីសាអូឌីត ក្លាយជាអ្នកផ្គត់ផ្គង់ប្រេងឆៅកំពូលរបស់ចិន នៅក្នុងឆ្នាំ២០២៣ កន្លងទៅ ខណ:ប្រទេសដែលនាំចូលប្រេងឆៅដ៏ធំបំផុតរបស់ពិភពលោកមួយនេះ បានប្រឆាំងទៅនឹងការដាក់ទណ្ឌកម្ម ដើម្បីទិញចូលប្រេងបញ្ចុះតម្លៃច្រើនសន្ធឹកសន្ធាប់ពីក្រុមហ៊ុនរបស់រុស្ស៊ី។ នេះបើតាមការចុះផ្សាយពីសារព័ត៌មាន CNA។
យោងតាមទិន្នន័យគយចិនបានបង្ហាញថា រុស្ស៊ីបានដឹកជញ្ជូនប្រេងឆៅចំនួន ១០៧,០២ លានតោន មកកាន់ប្រទេសរបស់ខ្លួនកាលពីឆ្នាំមុន ឬស្មើនឹង ២,១៤ លានបារ៉ែលក្នុងមួយថ្ងៃ (bpd) ដែលនេះមានន័យថារដ្ឋាភិបាលទីក្រុងប៉េកាំង បានទិញចូលប្រេងពីរុស្ស៊ី ច្រើនជាងប្រទេសនាំចេញប្រេងសំខាន់ៗផ្សេងទៀតដូចជា អារ៉ាប៊ីសាអូឌីត និងអ៊ីរ៉ាក់ ជាដើម។
គួរឲ្យដឹងថា ការនាំចូលពីប្រទេសអារ៉ាប៊ីសាអូឌីត ដែលពីមុនជាអ្នកផ្គត់ផ្គង់ធំជាងគេរបស់ប្រទេសចិន បានធ្លាក់ចុះ ១,៨% មកនៅត្រឹមចំនួន ៨៥,៩៦ លានតោន ប៉ុណ្ណោះ ដោយសារក្រុមហ៊ុនប្រេងដ៏ធំនៅតំបន់មជ្ឈិមបូព៌ា បានបាត់បង់ចំណែកទីផ្សារដ៏ច្រើនរបស់ខ្លួន នៅពេលដែលតម្លៃប្រេងឆៅរបស់រុស្ស៊ីដែលមានតម្លៃថោកជាង។
ជម្រាបជូនផងដែរថា ដោយសារតែត្រូវបានបដិសេធដោយអ្នកទិញអន្តរជាតិជាច្រើន បន្ទាប់ពីមានការដាក់ទណ្ឌកម្មពីសំណាក់ប្រទេសលោកខាងលិច ជុំវិញការឈ្លានពានរបស់វិមានក្រឹមឡាំង ទៅលើប្រទេសអ៊ុយក្រែន កាលពីឆ្នាំ២០២២ ប្រេងឆៅរបស់រុស្ស៊ី ត្រូវបានជួញដូរក្នុងការបញ្ចុះតម្លៃយ៉ាងច្រើន បើធៀបទៅនឹងតម្លៃស្តង់ដារអន្តរជាតិ កាលពីឆ្នាំ២០២៣ ខណ:ពេលដែលតម្លៃប្រេងឆៅដែលត្រូវបានកំណត់ដោយប្រទេសលោកខាងលិច មានការកើនឡើងខ្លាំង៕
