កិច្ចព្រមព្រៀងរបស់ក្រុមហ៊ុន Amazon ក្នុងការទិញយកក្រុមហ៊ុន iRobot ត្រូវបានបិទបញ្ចប់ទៅវិញ បន្ទាប់ពីភាគីខាងក្រុមហ៊ុន iRobot បាននិយាយថា កិច្ចព្រមព្រៀងដែលមានតម្លៃរហូតដល់ទៅ ១,៤ពាន់លានដុល្លារមួយនេះ មិនត្រូវបានទទួលស្គាល់ជាផ្លូវការ ដើម្បីឈានដល់ការអនុម័តពីសំណាក់សហភាពអឺរ៉ុបបាននោះឡើយ។ នេះបើតាមការចុះផ្សាយពីសារព័ត៌មាន Reuters។
ជុំវិញការរំសាយកិច្ចព្រមព្រៀងនេះ ត្រូវបានកើតឡើង ចំពេលដែលក្រុមហ៊ុន iRobot ក៏កំពុងប្រកាសថាខ្លួនឹងធ្វើការបញ្ឈប់បុគ្គលិកប្រហែល ៣៥០ នាក់ ឬប្រហែល ៣១% នៃកម្លាំងការងារសរុបរបស់ខ្លួន ដើម្បីជាផ្នែកមួយនៃការរៀបចំរចនាសម្ព័ន្ធក្រុមហ៊ុនឡើងវិញ។
គួរឲ្យដឹងទៀតផងដែរថា ជាផ្នែកនៃការរៀបចំរចនាសម្ព័ន្ធឡើងវិញ iRobot ក៏កំពុងផ្អាកការផលិតរបស់ខ្លួនទៅលើឧបករណ៍ស្នូលសំខាន់ៗដូចជា ម៉ាស៊ីនបន្សុទ្ធខ្យល់ និងម៉ាស៊ីនកាត់ស្មៅ ព្រមទាំងបិទការិយាល័យ និងហាងលក់គ្រឿងបរិក្ខារនានា នៅកន្លែងដែលអាជីវកម្មរបស់ខ្លួនមិនសូវដំណើរការផងដែរ។
ការប្រកាសនេះត្រូវធ្វើឡើងបន្ទាប់ពីកិច្ចព្រមព្រៀងក្នុងការទិញយកក្រុម iRobot របស់ Amazon ក្នុងតម្លៃប្រមាណ ១,៤ ពាន់លានដុល្លារ ត្រូវបានរារាំងដោយនិយតករសហភាពអឺរ៉ុប ដោយកាលពីខែវិច្ឆិកាឆ្នាំមុន គណៈកម្មការអឺរ៉ុប បាននិយាយថា កិច្ចព្រមព្រៀងនេះហាក់ផ្តល់ការរឹតបន្តឹងខ្លាំង ចំពោះការប្រកួតប្រជែងនៅក្នុងទីផ្សារ។
ជម្រាបជូនទៀតផងដែរថា និយតករអឺរ៉ុបក៏មានការព្រួយបារម្ភទៀតថាក្រុមហ៊ុន Amazon អាចនឹងប្រើសិទ្ធិក្នុងការទិញយកនេះ ដើម្បីលុបឈ្មោះ ឬកាត់បន្ថយក្រុមហ៊ុនដែលជាគូប្រជែង ដែលនឹងនាំឲ្យតម្លៃកាន់តែកើនឡើងខ្ពស់ ក៏ដូចជាគុណភាពទាប និងការច្នៃប្រឌិតតិច សម្រាប់អ្នកប្រើប្រាស់៕
