ភរិយារបស់មហាសេដ្ឋីចិន លោក Jack Ma គឺលោកស្រី Zhang Ying បានទិញផ្ទះអាជីវកម្មចំនួន ៣ ខ្នង នៅជិតតំបន់ Chinatown ក្នុងប្រទេសសិង្ហបុរី ជាមួយតម្លៃសរុបប្រមាណ ៣៧,១លានដុល្លារអាមេរិក។
យោងតាមការចុះផ្សាយពីសារពត៌មាន Business Times បានរាយការណ៍ទៀតថា អចលនទ្រព្យទាំងបីនោះ មានទីតាំងនៅតំបន់ដ៏ល្បីល្បាញ Duxton Road ដែលមានទំហំសរុប ៣០០ ម៉ែត្រការ៉េ ដែលនេះមានន័យថា ក្នុងមួយម៉ែត្រការ៉េ មានតម្លៃប្រមាណ ១២៣ ៣៣៣ដុល្លារ ។
ប្រភពដដែលនេះ បានបន្ថែមទៀតថា ផ្ទះអាជីវកម្មដែលមានកម្ពស់បីជាន់ ទាំងបីខ្នងនោះ កំពុងស្ថិតនៅក្នុងការជួសជុលនៅឡើយ ហើយនៅក្រោយពេលសាងសង់រួចរាល់ ជាន់ផ្ទាល់ដីនៃផ្ទះទាំងនោះ នឹងត្រូវប្រើប្រាស់ធ្វើជាភោជនីយដ្ឋាន ខណៈជាន់ខាងលើនឹងត្រូវប្រើជាការិយាល័យ។
គួរឲ្យដឹងផងដែរថា លោកស្រី Zhang បានដើរតួយ៉ាងសំខាន់ នៅក្នុងក្រុមហ៊ុនបច្ចេកវិទ្យាខ្នាតយក្សចិន Alibaba របស់ស្វាមីខ្លួន ដោយលោកស្រីបានខ្ចីលុយក្នុងចំនួន ១,៤លានដុល្លារ ដើម្បីចាប់ផ្តើមក្រុមហ៊ុនដំបូង។
ជម្រាបជូនផងដែរថា ក្រៅតែពីភរិយាមហាសេដ្ឋី Jack Ma នៅមានមហាសេដ្ឋីចិនផ្សេងទៀត ក៏បានបង្ហាញចំណាប់អារម្មណ៍ក្នុងការទិញអចលនទ្រព្យនៅក្នុងប្រទេសសិង្ហបុរី ក្នុងរយ:ពេលប៉ុន្មានឆ្នាំថ្មីៗនេះផងដែរ ដោយក្នុងនោះរាប់បញ្ចូលទាំង លោក Yonghong Shi ដែលជាសហស្ថាបនិករបស់ក្រុមហ៊ុនខ្សែសង្វាក់ហាងស៊ុប Hotpot Haidilao ដែលបានចំណាយលុយរាប់លានដុល្លារ ដើម្បីទិញអចលនទ្រព្យនៅជិតតំបន់ Singapore Botanic Gardens កាលពីឆ្នាំមុន៕
