សម្តេចតេជោ នាយករដ្ឋមន្ត្រី ហ៊ុន សែន បានណែនាំឲ្យរដ្ឋមន្ត្រី ៤រូប ប្រើប្រាស់កញ្ចប់ថវិកាយកទៅស្តារនិងជួសជុលហេដ្ឋារចនាសម្ព័ន្ធឡើងវិញ ក្រោយពេលទឹកស្រកភ្លាមដោយមិនត្រូវបង្អែបង្អន់សិក្សាយូរទេ។
សម្តេចបានប្រាប់រដ្ឋមន្រ្តីទាំង ៤ រូប មានឯកឧត្តមស៊ុន ចាន់ថុល រដ្ឋមន្រ្តីក្រសួងសាធារណៈការ មានក្រសួងសាធារណៈការ និងដឹកជញ្ជូន ឯកឧត្តមអ៊ុក រ៉ាប៊ុន រដ្ឋមន្រ្តីក្រសួងអភិវឌ្ឍជនបទ ឯកឧត្តមលឹម គានហោ រដ្ឋមន្រ្តីក្រសួងធនធានទឹក និងឧត្តុនិយម និងឯកឧត្តម វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ ត្រូវចាត់កម្លាំងចុះជួសជុលផ្លូវ ស្ពាន និងទំនប់ទឹក ដែលខូចខាតដោយជំនន់ទឹកភ្លៀង។
សម្តេចតេជោ ហ៊ុន សែន មានប្រសាសន៍ណែនាំថា សភាពការណ៍មិនធម្មតា ត្រូវមាននីតិវិធីដោះស្រាយមិនធម្មតាដែរ មិនត្រូវរង់ចាំមន្ត្រីចុះពិនិត្យ វាយតម្លៃអ្វីនោះទេ គឺត្រូវចាត់មន្ត្រីជំនាញ ចុះជួសជុលផ្លូវ ស្ពាន ដែលខូចដោយទឹកជំនន់នោះភ្លាមៗឡើងវិញ។
សម្តេចថា មានថវិកាត្រៀមបម្រុង ១៥០លានដុល្លារ ចឹងកុំឲ្យប្រជាពលរដ្ឋលំបាកពេលទឹកជំនន់ផង និងពេលទឹកស្រកហើយផង ត្រូវការចាយថវិកាប៉ុន្មាន ត្រូវស្នើទៅក្រសួងសេដ្ឋកិច្ច មានខ្ទង់ថវិកាបម្រុងដើម្បីដោះស្រាយក្នុងគ្រាអាសន្ន៕
