អតីតមហាសេដ្ឋីវ័យក្មេងមួយរូប ប្រឈមមុខនឹងការជាប់ពន្ធនាគាររាប់សិបឆ្នាំ

អតីតមហាសេដ្ឋីគ្រីបតូ លោក Sam Bankman-Fried កំពុងប្រឈមនឹងការជាប់ពន្ធនាគារ រយៈពេលរាប់សិបឆ្នាំ ពីបទឆបោកធំបំផុតមួយនៅសហរដ្ឋអាមេរិក ខណៈបច្ចុប្បន្នគឺកំពុងរង់ចាំការសម្រេចពីតុលាការ។

យោងតាមការចុះផ្សាយពីទីភ្នាក់ងារសារព័ត៌មាន AP បានបង្ហាញថា អតីម្ចាស់ក្រុមហ៊ុន FTX ត្រូវបានចោទប្រកាន់ពីបទឆបោក កាលពីខែវិច្ឆិកាឆ្នាំមុន ហើយនាថ្ងៃទី២៨ ខែមីនានេះ គឺកំពុងស្ថិតនៅតុលាការរង់ចាំការកាត់ទោស។

ក្នុងនោះ ព្រះរាជអាជ្ញាបានដាក់សំណើឲ្យមានការកាត់ទោស អតីតមហាសេដ្ឋីវ័យក្មេងម្នាក់នេះ ជាប់ពន្ធនាគារចន្លោះពី ៤០ ទៅ ៥០ឆ្នាំ ក៏ប៉ុន្តែមេធាវីការពារក្ដីរបស់លោក បានទាមទារឲ្យមាន​ការកាត់ទោសត្រឹម ៦ឆ្នាំកន្លះប៉ុណ្ណោះ។

រំលឹកបន្តិចថា តុលាការបានរកឃើញថា លោក Sam បានយកលុយវិនិយោគនៅក្នុងក្រុមហ៊ុន FTX ដែលជាវេទិកាជួញដូរកាក់គ្រីបតូដ៏ធំមួយ មកប្រើប្រាស់ទិញសម្ភារៈនិយមផ្ទាល់ខ្លួន និងទិញអចលនទ្រព្យធំៗមួយចំនួន រហូតគ្មានលទ្ធភាពបង្វិលប្រាក់ចូលក្រុមហ៊ុនវិញទាន់ពេល និងបានបណ្ដាលឲ្យក្រុមហ៊ុនមួយនេះក្ស័យធន ក៏ដូចជាវិនិយោគិន និងអតិថិជនរាប់ពាន់នាក់ ទទួលការខាតបង់ទឹកប្រាក់ជាច្រើន៕