ក្រុមហ៊ុនរថយន្តអគ្គិសនី Tesla គ្រោងធ្វើការកាត់បន្ថយបុគ្គលិកច្រើនជាង ១០% នៅក្នុងឆ្នាំនេះ បន្ទាប់ពីអត្រាលក់របស់ខ្លួន មានការថយចុះជាខ្លាំង។ នេះបើតាមការចុះផ្សាយពីសារព័ត៌មាន CBS។
គិតត្រឹមចុងខែធ្នូ ឆ្នាំ២០២៣ ក្រុមហ៊ុន Tesla មានបុគ្គលិកប្រមាណ ១៤០ ៤៧៣នាក់ ដែលនេះមានន័យថា បុគ្គលិកយ៉ាងតិច ១៤ ០០០នាក់ នឹងត្រូវបានបណ្ដេញចេញនៅក្នុងឆ្នាំនេះ។
រំលឹកបន្តិចថា អត្រាលក់រថយន្តអគ្គិសនី Tesla នាត្រីមាសទីមួយក្នុងឆ្នាំនេះ គឺមានទាបជាងរយៈពេលដូចគ្នាកាលពីឆ្នាំមុន ប្រហែល ៩% ពោលគឺលក់រថយន្តបានជាង ៣៨០ ០០០គ្រឿង ខណៈកាលពីឆ្នាំទៅលក់បានរហូតដល់ ៤២៣ ០០០គ្រឿង។
ជម្រាបបន្ថែមថា ជុំវិញការកាត់បន្ថយបុគ្គលិកនេះផងដែរ ក្រុមហ៊ុន Tesla នៅមិនទាន់ប្រកាសជាផ្លូវការនៅឡើយ ក៏ប៉ុន្តែមានបែកធ្លាយសារដែលសរសេរដោយមេធំ Elon Musk ផ្ទាល់ ដោយបានបញ្ជាក់ប្រាប់ក្រុមបុគ្គលិកថា ក្រុមហ៊ុនត្រូវតែបង្ខំចិត្តកាត់បន្ថយបុគ្គលិកយ៉ាងតិច ១០% ដើម្បីអាចឲ្យក្រុមហ៊ុនមានទុន ក្នុងការអភិវឌ្ឍន៍ទៅមុខបន្ថែមទៀត៕
