នាយករដ្ឋមន្ត្រីវៀតណាម ទទូចសុំឲ្យវិនិយោគិនចិន បន្ថែមការបណ្ដាក់ទុនក្នុងស្រុក

នាយករដ្ឋមន្ត្រីវៀតណាម លោក Pham Minh Chinh បានទទូចសុំឲ្យក្រុមហ៊ុនចិនជាច្រើន បន្តការបណ្ដាក់ទុននៅក្នុងគម្រោងធំៗក្នុងប្រទេសវៀតណាមបន្ថែមទៀត។ នេះបើតាមការចុះផ្សាយពីគេហទំព័រ VNExpress។

រដ្ឋាភិបាលវៀតណាម បានលើកឡើងថា វិស័យដែលវៀតណាមចង់ឲ្យវិនិយោគិនចិន បន្ថែមការវិនិយោគនោះគឺមានដូចជា វិស័យច្នៃប្រឌិត ឌីជីថល ថាមពលកកើតឡើងវិញ ទីក្រុងឆ្លាតវៃ ការផលិត និងហេដ្ឋារចនាសម្ព័ន្ធដឹកជញ្ជូនជាដើម។

គួររំលឹកបន្តិចថា ទំហំពាណិជ្ជកម្មរវាងចិន និងវៀតណាម មានកំណើនរហូតដល់ ៤ដងក្នុងរយៈពេល ១០ឆ្នាំចុងក្រោយ ដោយសម្រេចបាន ១៧២ពាន់លានដុល្លារកាលពីឆ្នាំទៅ។

ជម្រាបបន្ថែមថា បច្ចុប្បន្ននេះ ចិនគឺជាដៃគូវិនិយោគបរទេសធំបំផុតរបស់វៀតណាមទី០៦ ដោយបានបណ្ដាក់ទុនប្រហែល ២៧,៦ពាន់លានដុល្លារ ក្នុងគម្រោងវិនិយោគប្រមាណ ៤ ៤០០កន្លែងនៅប្រទេសវៀតណាម៕