ចិន ប្រកាសហាមឃាត់ក្រុមហ៊ុនអាមេរិកធំៗមួយចំនួន ពីការធ្វើជំនួញនៅក្នុងប្រទេសខ្លួន

ក្រសួងពាណិជ្ជកម្មចិន បាននិយាយនៅថ្ងៃចន្ទនេះថា ខ្លួននឹងហាមឃាត់ក្រុមហ៊ុនអាមេរិកមួយចំនួនពីសកម្មភាពនាំចូល និងនាំចេញទំនិញនៅក្នុងប្រទេសខ្លួន រួមទាំងហាមមិនឲ្យពួកគេធ្វើការវិនិយោគថ្មីៗ ផងដែរ ដោយសារពាក់ព័ន្ធទៅនឹងការលក់អាវុធទៅឲ្យតៃវ៉ាន់។ នេះបើតាមការចុះផ្សាយពីសារព័ត៌មាន Reuters។

ក្រសួងពាណិជ្ជកម្មចិន បានកំណត់គោលដៅទៅលើក្រុមហ៊ុន General Atomics Aeronautical Systems, General Dynamics Land Systems និង Boeing Defense, Space & Security ដោយដាក់បញ្ចូលពួកគេទៅក្នុងបញ្ជីក្រុមហ៊ុនដែលមិនគួរឲ្យទុកចិត្ត ពាក់ព័ន្ធជាមួយនឹងការលក់អាវុធឲ្យកោះតៃវ៉ាន់។

ទន្ទឹមនឹងនេះ សេចក្តីប្រកាសរបស់ក្រសួង បានបង្ហាញឲ្យដឹងទៀតថា នាយកប្រតិបត្តិជាន់ខ្ពស់របស់ក្រុមហ៊ុនទាំងបីនោះ នឹងត្រូវបានហាមឃាត់មិនឲ្យចូលទឹកដីប្រទេសចិនឡើយ ស្របពេលលិខិតអនុញ្ញាតការងាររបស់ពួកគេក៏នឹងត្រូវដកហូត ផងដែរ។

ជម្រាបជូនថា បើតាមរបាយការណ៍ពីទីភ្នាក់ងារសារព័ត៌មានរដ្ឋ Xinhua បាននិយាយថា វិធានការបែបនេះ កំពុងត្រូវបានអនុវត្តដើម្បីការពារអធិបតេយ្យភាពជាតិ សន្តិសុខ និងផលប្រយោជន៍អភិវឌ្ឍរបស់ប្រទេសចិន៕