នាយកប្រតិបត្តិ និងជាប្រធានកំពូលក្រុមហ៊ុនផលិតបន្ទះឈីប Nvidia លោក Jensen Huang ត្រូវបានគេមើលឃើញថា ដោយសារ ផលិតផលបន្ទះឈីបកំពុងមានតម្រូវការខ្ពស់ ទ្រព្យសម្បត្តិរបស់លោកមានការកើនឡើង ២៦ដងឯណោះដល់ទៅជិត ៩៤ពាន់លានដុល្លារនៅអំឡុងរយៈពេល ៥ឆ្នាំមកនេះ។
សារព័ត៌មាន VN Express បានចុះផ្សាយថា កាលពីថ្ងៃសុក្រកន្លងទៅថ្មីៗលោក Huang ដែលជាម្ចាស់ភាគហ៊ុន៣,៥% បានមើលឃើញនូវទ្រព្យសម្បត្តិសុទ្ធរបស់ខ្លួនមានការកើនឡើង ៧,៧ពាន់លានដុល្លារ ខណៈដែលភាគហ៊ុនក៏មានការកើនឡើង៩% ផងដែរ។
ម្យ៉ាងវិញទៀត សារព័ត៌មាន Reuters បានចុះផ្សាយថា Nvidia មានតម្លៃទីផ្សារប្រហាក់ប្រហែល ២,៦ទ្រីលានដុល្លារ ដែលធ្វើឲ្យវាក្លាយជាក្រុមហ៊ុនឈរនៅលំដាប់លេខរៀងទីបីរបស់ Wall Street តាមពីក្រោយក្រុមហ៊ុន Microsoft និង Apple ។
គួរបញ្ជាក់ថា នៅបីខែដំបូងដើមឆ្នាំ ក្រុមហ៊ុនបានប្រកាសពីប្រាក់ចំណូលប្រចាំត្រីមាសចំនួន ២៦ពាន់លានដុល្លារ ខណៈវាក៏រំពឹងថានឹងទទួលបានប្រាក់ចំណូលចំនួន ២៨ពាន់លានដុល្លារទៀតនៅក្នុងត្រីមាសទីពីរនេះ។
សូមជម្រាបថាលោក Huang បានបង្កើតក្រុមហ៊ុន Nvidia នៅឆ្នាំ១៩៩៣ ដើម្បីផលិតបន្ទះឈីបសម្រាប់ការលេងហ្គេម។ តែក្រោយមក ដោយភាពរីកចម្រើននៃកម្មវិធី AI ជាពិសេស ChatGPT នៃ OpenAI បានធ្វើឲ្យតម្រូវការបន្ទះឈីបរបស់ Nvidia មានការកើនឡើងកាន់តែខ្លាំង ពោល Nvidia នាពេលបច្ចុប្បន្នមានចំណែកទីផ្សារដល់ទៅ៨០% នៃបន្ទះឈីប AI របស់ពិភពលោក៕
