អំឡុងកិច្ចប្រជុំជាមួយប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃទី២៧ ឧសភា ប្រធានាធិបតីអ៊ូសបេគីស្ថានលោក Shavkat Mirxiyoyev បានមានប្រសាសន៍ថា រុស្ស៊ីនឹងសាងសង់រោងចក្រថាមពលនុយក្លេអ៊ែរតូចមួយនៅអ៊ូសបេគីស្ថាន ហើយវាក៏ជាគម្រោងដំបូងគេសាងសង់នៅប្រទេសស្ថិតក្នុងតំបន់អាស៊ីកណ្តាល។ នេះបើតាមការចុះផ្សាយពីសារព័ត៌មាន Aljazeera ។
ក្នុងជំនួបនោះលោក ពូទីន ក៏បានលើកឡើងផងដែរថា៖ “ប្រទេសរុស្ស៊ីនឹងដាក់ទុនវិនិយោគប្រមាណ ៤០០លានដុល្លារចូលទៅក្នុងគម្រោងវិនិយោគរួមគ្នាចំនួន ៥០០លានដុល្លារជាមួយអ៊ូសបេគីស្ថាន”។ ម្យ៉ាងវិញទៀត បើយោងតាមឯកសារដែលចេញផ្សាយដោយវិមានក្រឹមឡាំង ក្រុមហ៊ុននុយក្លេអ៊ែររដ្ឋ Rosatom នឹងតំឡើងម៉ាស៊ីនរ៉េអាក់ទ័រនុយក្លេអ៊ែរចំនួនប្រាំមួយគ្រឿង ដែលមានសមត្ថភាពផលិតកម្លាំងបាន ៥៥មេហ្គាវ៉ាត់។
កិច្ចព្រមព្រៀងមួយនេះ នឹងបង្ហាញពីសមត្ថភាពរបស់រុស្ស៊ី ដែលអាចនាំចេញមិនមែនត្រឹមតែថាមពលប៉ុណ្ណោះទេ ក៏ប៉ុន្តែថែមទាំងផលិតផលបច្ចេកវិទ្យាទំនើបៗចូលទៅក្នុងទីផ្សារអាស៊ី បើទោះជាមហាអំណាចរុស្ស៊ី កំពុងស្ថិតក្រោមសម្ពាធទណ្ឌកម្មអន្តរជាតិក៏ដោយ។
គួរបញ្ជាក់ផងដែរថា កិច្ចពិភាក្សារវាងលោក ពូទីន និងលោក Mirziyoyev ធ្វើឡើងនៅក្នុងរដ្ឋធានី Tashkent ប្រទេសអ៊ូសបេគីស្ថាន ខណៈដែលវាជាដំណើរទស្សនកិច្ចទៅក្រៅប្រទេសលើកទីបីរបស់កំពូលមេដឹកនាំរុស្ស៊ី ចាប់តាំងពីបានសច្ចាប្រណិធានក្នុងអាណត្តិជាប្រធានាធិបតីលើកទីប្រាំ កាលពីដើមខែឧសភា៕
