រដ្ឋមន្ត្រីក្រសួងទំនាក់ទំនង និងព័ត៌មានឥណ្ឌូណេស៊ី លោក Budi Arie Setiadi ថ្មីៗនេះ បានស្នើសុំឲ្យប្រទេសចិន មកសហការវិនិយោគលើបញ្ញាសិប្បនិមិត្ត (AI) នៅក្នុងប្រទេសរបស់ខ្លួន ក្នុងអំឡុងពេលកិច្ចប្រជុំទ្វេភាគីជាមួយអនុរដ្ឋមន្ត្រីក្រសួងឧស្សាហកម្ម និងបច្ចេកវិទ្យាព័ត៌មានចិន លោក Shan Zhongde ។ នេះបើតាមការចុះផ្សាយពីសារព័ត៌មាន The Star។
សម្រាប់ជំនួបទ្វេភាគីនេះ ត្រូវបានធ្វើឡើងក្នុងអំឡុងកិច្ចប្រជុំធំមួយ នៅក្នុងទីក្រុងហ្សឺណែវ កាលពីថ្ងៃចន្ទ ទី២៧ ខែឧសភា ដែលជាផ្នែកមួយនៃដំណើរទស្សនកិច្ចការងាររបស់ លោក Setiadi ទៅកាន់ប្រទេសស្វីស។
មិនតែប៉ុណ្ណោះ នៅក្នុងជំនួបនោះ លោករដ្ឋមន្ត្រី Setiadi បានបង្ហាញពីសក្ដានុពលរបស់ប្រទេសឥណ្ឌូណេស៊ី ក្នុងការអភិវឌ្ឍទៅលើប្រព័ន្ធ AI និងការវិនិយោគលើធនធានមនុស្ស ដែលត្រូវបានគេរំពឹងថានឹងលើកទឹកចិត្តដល់វឌ្ឍនភាពសម្រាប់ការច្នៃប្រឌិតទៅលើ AI ផ្សេងទៀត។
ទន្ទឹមនឹងនេះ ក៏មានការពិភាក្សាផ្សេងទៀតផងដែរអំពីមធ្យោបាយដែលឥណ្ឌូណេស៊ី អាចប្រើប្រាស់ប្រព័ន្ធ AI ដើម្បីបង្កើនសេដ្ឋកិច្ចឌីជីថល ដើម្បីអាចឲ្យប្រទេសរបស់ខ្លួន ប្រែក្លាយទៅជាប្រទេសអភិវឌ្ឍ។
ជុំវិញសក្តានុពលនេះ លោក Setiadi សង្ឃឹមថាអាចនឹងទាក់ទាញចំណាប់អារម្មណ៍ប្រទេសចិន ក្នុងការជួយគាំទ្រដល់ការអភិវឌ្ឍនៃឌីជីថលនីយកម្មរបស់ប្រទេសឥណ្ឌូណេស៊ី តាមរយៈប្រព័ន្ធ AI ជាពិសេសនៅក្នុងតំបន់ដែលដាច់ស្រយាល៕
