លោកអ្នកឧកញ៉ា ទ្រី ភាព អនុប្រធានក្រុមការងារគណបក្សចុះមូលដ្ឋានខេត្ត និងជាប្រធានក្រុមការងារគណបក្សចុះមូលដ្ឋានស្រុកប្រាសាទបល្ល័ង្ក ខេត្តកំពង់ធំ នាព្រឹកថ្ងៃទី១៦ ខែមិថុនា ឆ្នាំ២០២៤នេះ បានអញ្ជើញជាអធិបតីក្នុងពិធីប្រកាសសមាសភាព ក្រុមការងារគណបក្សចុះមូលដ្ឋានស្រុក និង ឃុំទាំង ៧ នៃស្រុកប្រាសាទបល្ល័ង្ក ខេត្តកំពង់ធំ។
ពិធីប្រកាសសមាសភាពក្រុមការងារចុះមូលដ្ឋានឃុំទាំង៧នេះ មានការចូលរួមពីឯកឧត្តម លោកជំទាវ ឧកញ៉ា លោក-លោកស្រី ជាសមាជិក សមាជិកាក្រុមការងារថ្នាក់ខេត្ត និងជាប្រធាន អនុប្រធាន សមាជិក សមាជិកាគណបក្សស្រុក និងគណបក្សឃុំចូលរួមប្រមាណ ៧០០ នាក់។
បន្ទាប់ពីការប្រកាសសេចក្តីសម្រេចសមាសភាពថ្នាក់ដឹកនាំ សមាជិកក្រុមការងារគណបក្សចុះមូលដ្ឋានស្រុកប្រាសាទបល្ល័ង្គ រួចមក លោកអ្នកឧកញ៉ា ទ្រី ភាព ក៏បានថ្លែងអំណរគុណ ដល់ក្រុមការងារថ្នាក់ ស្រុក ឃុំ និងអាជ្ញាធរទាំងអស់ ដែលបានខិតខំបំពេញការងារ អនុវត្តកម្មវិធីនយោបាយ និង យុទ្ធសាស្រ្ដរបស់រាជរដ្ឋាភិបាល សម្រេចបានលទ្ធផលយ៉ាងល្អប្រសើរ សំខាន់លើការបោះឆ្នោតជ្រើសតាំងតំណាងរាស្ត្រ នីតិកាលទី៧ ធ្វើឱ្យខេត្តទទួលបានជ័យជំនះត្រចះត្រចង់។
លោកអ្នកឧកញ៉ា ក៏បានស្នើឲ្យថ្នាក់ដឹកនាំ សមាជិក សមាជិកាគណបក្សប្រជាជនទាំងអស់ បន្តបម្រើមូលដ្ឋានអស់ពីចិត្តពីថ្លើម បន្តអនុវត្តត្រឹមត្រូវតាមលក្ខន្តិកៈ បទបញ្ជាផ្ទៃក្នុង និងលិខិតបទដ្ឋាននានា របស់គណបក្សប្រជាជនកម្ពុជា និងអនុវត្តឲ្យបានល្អតាមគោលការណ៍ណែនាំចាត់តាំង របស់គណបក្ស។
ក្នុងឱកាសនេះដែរ លោកអ្នកឧកញ៉ា ទ្រី ភាព ប្រធានក្រុមការងារគណបក្សស្រុកប្រាសាទបល្ល័ង្ក ក៏បាននាំយកនូវអំណោយជាថវិកាប្រគល់ជូនគណបក្សស្រុក គណបក្សឃុំ កងកម្លាំងប្រដាប់អាវុធ និងសជិកសមាជិកា ដែលអញ្ជើញចូលរួមផងដែរ ដែលសរុបជាទឹកប្រាក់អស់ប្រមាណជា ១៤០.០០០.០០០ រៀល ព្រមទាំងចូលរួមពិសារអាហារសាមគ្គីជាមួយប្រធាន អនុប្រធាន និងសមាជិក សមាជិកាគណបក្សប្រកបដោយភាពស្និតស្នាល។
សូមជម្រាបថា សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានចេញសេចក្តីសម្រេចចាត់តាំង លោកអ្នកឧកញ៉ា ទ្រី ភាព អគ្គនាយកក្រុមហ៊ុន ទ្រី ភាព គ្រុប ជាអនុប្រធានក្រុមការងារគណបក្សចុះមូលដ្ឋានខេត្តកំពង់ធំ ដែលមានលោក វង្សី វិស្សុត ឧបនាយករដ្ឋមន្ត្រី ជាប្រធាន កាលពីថ្ងៃទី២៤ ខែមករា ឆ្នាំ២០២៤។ លើសពីនេះ លោកអ្នកឧកញ៉ា ក៏ទទួលបានការតែងតាំងជា បេសកជនពិសេស របស់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា នៅថ្ងៃទី១៩ ខែមេសា ឆ្នាំ២០២៤៕
