ក្រុមហ៊ុនមហាសេដ្ឋីហ្វីលីពីន ចាយលុយ ២៤ពាន់លានដុល្លារ ទិញយន្តហោះ ១៥២គ្រឿង

ក្រុមហ៊ុនអាកាសចរណ៍ Cebu Pacific របស់មហាសេដ្ឋីហ្វីលីពីន Lance Gokongwei ត្រៀមចាយលុយប្រហែល ២៤ពាន់លានដុល្លារ ដើម្បីទិញយន្តហោះ ១៥២គ្រឿង ពីក្រុមហ៊ុន Airbus។

យោងតាមការចុះផ្សាយពីសារព័ត៌មាន Nikkei Asia បានបង្ហាញថា ក្រុមហ៊ុនទាំង ២ បានចុះអនុស្សរណៈយោគយល់ លើការទិញលក់ខាងលើ ខណៈកិច្ចព្រមព្រៀងនេះ គ្រោងបញ្ចប់នៅត្រីមាសទី៣ ក្នុងឆ្នាំនេះ។

ក្នុងចំណោមយន្តហោះទាំង ១៥២គ្រឿងនោះ ក្រុមហ៊ុន Cebu Pacific បានបញ្ជាទិញម៉ូដែល A321neo ចំនួន១០២គ្រឿង និងម៉ូដែល A320neo ចំនួន ៥០គ្រឿង ដើម្បីបង្កើនសមត្ថភាពដឹកអ្នកដំណើរឲ្យកាន់តែខ្ពស់ជាងមុន។

សូមជម្រាបដែរថា បច្ចុប្បន្នក្រុមហ៊ុនអាកាសចរណ៍របស់មហាសេដ្ឋីហ្វីលីពីនមួយនេះ មានយន្តហោះចំនួន ៨៧គ្រឿង កំពុងធ្វើប្រតិបត្តិការណ៍ ដោយមានជើងហោះហើរក្នុងស្រុកចំនួន ៦៥ និងជើងហោះហើរក្រៅប្រទេសចំនួន ៣៣៕