ក្រុមហ៊ុនផលិរថយន្តអគ្គិសនីខ្នាតយក្សរបស់ប្រទេសចិន BYD នៅថ្ងៃព្រហស្បតិ៍ ទី៤ ខែកក្កដានេះ បានបើកសម្ពោធរោងចក្រផលិលតរថយន្តអគ្គិសនីដំបូង នៅក្នុងប្រទេសថៃ ហើយក៏ជារោងចក្រដំបូងបំផុតរបស់ខ្លួន នៅក្នុងតំបន់អាស៊ីអាគ្នេយ៍ផងដែរ។ នេះបើតាមការចុះផ្សាយពីសារព័ត៌មាន CNA។
នាយកប្រតិបត្តិ និងជាប្រធានក្រុមហ៊ុន BYD លោក Wang Chuanfu បាននិយាយនៅក្នុងពិធីបើកសម្ពោធរោងចក្រនេះថា ប្រទេសថៃមានចក្ខុវិស័យទៅលើរថយន្ត EV ច្បាស់លាស់ ហើយកំពុងឈានចូលយុគសម័យថ្មីនៃការផលិតរថយន្តប្រភេទនេះ។ យើងនឹងប្តេជ្ញាក្នុងការនាំយកបច្ចេកវិទ្យារបស់ប្រទេសចិន ចូលមកកាន់ប្រទេសថៃ។
រោងចក្រថ្មីរបស់ក្រុមហ៊ុន BYD នេះ គឺជាផ្នែកមួយនៃការវិនិយោគដែលមានតម្លៃដល់ជាង ១,៤៤ពាន់លានដុល្លារ របស់ក្រុមហ៊ុនផលិតរថយន្តអគ្គិសនីលំដាប់កំពូលចិន ស្របពេលរដ្ឋាភិបាលរបស់ប្រទេសថៃ ក៏បានជួយវិញតាមរយ:ការឧបត្ថម្ភធន និងការលើកទឹកចិត្តពន្ធ ផងដែរ។
រំលឹកផងដែរថា ផែនការសាងសង់រោងចក្រដែលមានតម្លៃ ៤៩០លានដុល្លារ នៅក្នុងខេត្ត Rayong ភាគខាងកើតប្រទេសថៃ ត្រូវបានប្រកាសកាលពី ២ឆ្នាំមុន ជាមួយនឹងសមត្ថភាពផលិតរថយន្តអគ្គិសនីបានចំនួន ១៥០ ០០០ គ្រឿងក្នុងមួយឆ្នាំ រួមទាំងរថយន្តប្រភេទ Plug-in Hybrid ផងដែរ ដោយរោងចក្រនេះនឹងផ្តល់ការងារដល់កម្មករក្នុងស្រុកប្រហែល ១០ ០០០ នាក់ ។
ជម្រាបជូនផងដែរថា ប្រទេសថៃគឺជាមជ្ឈមណ្ឌលដំឡើង និងនាំចេញរថយន្តដ៏ធំបំផុតមួយនៅក្នុងតំបន់ ខណ:បច្ចុប្បន្នកំពុងមានការប្រកួតប្រជែងខ្លាំង ជាពិសេសក្រុមហ៊ុនផលិតរថយន្តអគ្គិសនី នៅពេលដែល BYD ក៏មានគូប្រជែងក្នុងស្រុក ដូចជា Tesla និង Great Wall Motor ដែលមានរោងចក្រផលិតនៅក្នុងប្រទេសថៃ ផងដែរ៕
