ក្រសួងការងារ និងបណ្តុះបណ្តាលវិជ្ជាជីវៈ បានកំពុងពន្លឿនដល់ដំណើរការសាងសង់ទារកដ្ឋានសម្រាប់កូនៗកម្មករនៅតាមរោងចក្រ ដើម្បីជួយសម្រួលដល់បងប្អូនកម្មករនិយោជិតក្នុងរោងចក្រអាចយកកូនៗមកផ្ញើក្នុងទារកដ្ឋាន។
ការពន្លឿនដំណើរការសាងសង់ទារកដ្ឋាននេះ ធ្វើឡើងក្នុងឱកាសលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានចុះពិនិត្យមើលទីតាំងសម្រាប់សាងសង់ទារកដ្ឋាន និងពិនិត្យសង្វាក់ផលិតកម្មដ៏ទំនើបក្នុងតំបន់រោងចក្រម៉ាវ៉ល ហ្កាមិន ដែលស្ថិតក្នុងតំបន់សេដ្ឋកិច្ចពិសេសភ្នំពេញ ខណ្ឌកំបូល រាជធានីភ្នំពេញ កាលថ្ងៃទី០១ ខែសីហា ឆ្នាំ២០២៤។
ក្នុងឱកាសនោះ លោករដ្ឋមន្ត្រីបានត្រួតពិនិត្យដោយផ្ទាល់នៅទីតាំងសាងសង់ជាទារកដ្ឋាននៅក្នុងតំបន់រោងចក្រនេះ សម្រាប់ការមើលថែទាំកូនៗរបស់កម្មករនិយោជិត ដែលមានអាយុចាប់ពីទារកក្រោយពេលកើតរហូតដល់អាយុ ៣ឆ្នាំ។
លោករដ្ឋមន្ត្រី បានណែនាំឱ្យមន្រ្តីជំជំនាញរបស់ក្រសួងបន្តធ្វើការសហការជាមួយភាគីរោងចក្រដើម្បីឈានដល់ការសាងសង់ក្នុងពេលឆាប់ៗខាងមុខ រហូតដល់បញ្ចប់ដំណើរការសាងសង់ឱ្យបានរលូន ដើម្បីជួយសម្រួលដល់បងប្អូនកម្មករនិយោជិតក្នុងរោងចក្រអាចយកកូនៗមកផ្ញើក្នុងទារកដ្ឋាន ដើម្បីទទួលបានការមើលថែទាំសុខភាព និងទទួលបានអាហារូបត្ថម្ភគ្រប់គ្រាន់សម្រាប់ទារក ដែលជាមូលធនមនុស្សកម្ពុជាចាប់ពីតូចទៅតែម្តង។
ជាមួយគ្នានេះ លោកបានគូសបញ្ជាក់ថា នេះជាការយកចិត្តទុកដាក់ពីសំណាក់រាជរដ្ឋាភិបាលកម្ពុជាក្នុងអាណត្តិទី៧នេះ ដឹកនាំដោយសម្តេចធិបតី ហ៊ុន ម៉ាណែត ដោយមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការក្នុងការអនុវត្តកិច្ចការងារដ៏សំខាន់នេះចាប់ពីឆ្នាំ២០២៤នេះតទៅ ដើម្បីបម្រើជាប្រយោជន៍ដល់កម្មករនិយោជិត ក៏ដូចជាធនធានមនុស្សជំនាន់ក្រោយ។
សូមបញ្ជាក់ដែរថា បើតាមក្រសួងការងារ រហូតមកទល់ពេលនេះ នៅកម្ពុជាមានអគារទារកដ្ឋានចំនួន១៣ នៅទូទាំងប្រទេស ក្នុងនោះមាននៅខេត្តកំពង់ស្ពឺចំនួន១០ កន្លែង និងខេត្តកំពង់ចាមមានចំនួន៣កន្លែង។
កាលពីពេលថ្មីៗនេះ សម្តេចធិបតី ហ៊ុន ម៉ាណែត ក៏បានផ្តល់អនុសាសន៍ឱ្យក្រសួងការងារខិតខំជំរុញការងារបង្កើតកន្លែងទារកដ្ឋាននេះឱ្យបានរួចរាល់នៅឆ្នាំ២០២៤ និង២០២៥ ខាងមុខ។
សម្តេចធិបតីធ្លាប់បានលើកឡើងថា ការរៀបចំឱ្យមានទារកដ្ឋាននៅកន្លែងការងារនេះនឹងផ្ដល់ភាពងាយស្រួលដល់មាតានិងទារកស្ត្រីមានកូនតូចៗនឹងមានជម្រើសច្រើនក្នុងការបំបៅដោះកូន ជាពិសេសចំណេញថវិកានិងបង្កើនផលិតភាពការងារថែមទៀត៕ អត្ថបទ៖ រង្សី
