អតីតប្រធានាធិបតី ដូណាល់ ត្រាំ របូតលុយអស់ ៩០០លានដុល្លារ ក្រោយលេចវត្តមានគូប្រជែងថ្មី

យោងតាមការចុះផ្សាយពីសារព័ត៌មាន CNN បានបង្ហាញថា មហាសេដ្ឋី និងជាអតីតប្រធានាធិបតីអាមេរិក លោក ដូណាល់ ត្រាំ បានរបូតលុយអស់ប្រហែល ៩០០លានដុល្លារ បន្ទាប់ពីអ្នកស្រី Kamala Harris ប្រកាសចូលខ្លួន មកប្រជែងតំណែងមេដឹកនាំអាមេរិក។

បន្ទាប់ពីលេចវត្តមានគូប្រជែងថ្មី ប្រជាប្រិយភាពរបស់លោក ដូណាល់ ត្រាំ ហាក់មានការថមថយ ដែលធ្វើឲ្យតម្លៃភាគហ៊ុននៃក្រុមហ៊ុន Trump Media and Technology Group (TMTG) មានការថយចុះដល់ ២៣% និងបានធ្វើឲ្យទ្រព្យសម្បត្តិរបស់លោកត្រាំ ថយចុះពី ៤ពាន់លានដុល្លារ មកនៅត្រឹម ៣,១ពាន់លានដុល្លារប៉ុណ្ណោះ។

គួររំលឹកបន្តិចថា ក្រុមហ៊ុន TMTG គឺជាប្រភពចំណូលធំបំផុតមួយរបស់អតីតមេដឹកនាំអាមេរិករូបនេះ ខណៈកញ្ចប់ប្រាក់សម្រាប់ធ្វើយុទ្ធនាការឃោសនារកសន្លឹកឆ្នោតរបស់លោក ក៏ត្រូវដកចេញពីក្រុមហ៊ុនខ្នាតយក្សមួយនេះចំណែកធំផងដែរ។

សូមជម្រាបដែរថា ចាប់តាំងពីអ្នកស្រី Kamala Harris ប្រកាសឈរឈ្មោះជាបេក្ខភាពប្រធានាធិបតី តំណាងឲ្យគណបក្សប្រជាធិបតេយ្យ ប្រជាប្រិយភាពរបស់លោក ត្រាំ ហាក់មានការថយចុះ ដ្បិតតាមរបាយការណ៍ស្រង់មតិ រៀបរៀងដោយគេហទំព័រ Reuters បានបង្ហាញ ប្រជាជនអាមេរិកប្រហែល ៥៥% បង្ហាញការគាំទ្រចំពោះអនុប្រធានាធិបតីស្រីរូបនេះ ខណៈសម្លេងគាំទ្រលោកត្រាំ បច្ចុប្បន្នទទួលបានត្រឹម ៤៥%ប៉ុណ្ណោះ៕